მადრიდის “რეალის” მთავარი მწვრთნელი, კარლო ანჩელოტი “ბარსელონასთან” მოგებული მატჩის (3:1) შემდგომ პრესკონფერენციაზე გამოცხადდა და აღნიშნულ შეხვედრაზე ისაუბრა.

იტალიელი სპეციალისტის თქმით, მისმა გუნდმა დამსახურებული გამარჯვება იზეიმა და ძალიან კმაყოფილია თავისი შეგირდებით.

“რა იყო დღეს საუკეთესო ჩვენი მხრიდან? ძალისხმევა. გაშვებული გოლის შემდეგ არ დავბნეულვართ და იმ თამაშის ჩვენება განვაგრძეთ, როგორსაც ვაპირებდით. ყველაფერი შესანიშნავად დასრულდა. გუნდი ძალიან მაღალ ტემპში თამაშობდა, რაც ძალიან მომეწონა. დღევანდელი გამარჯვება დავიმსახურეთ.

მინდა ავღნიშნო, რომ დაცვამ კარგად ითამაშა. დღეს იყო ის თავგანწირვა, რაც რიგ შეხვედრებში გვაკლია. სასურველია, რომ ყოველ მატჩში ასეთი რამ ხდებოდეს.

ისკომ შესანიშნავად ითამაშა და უდიდესი სამუშაო გასწია, ისევე როგორც სხვებმა. ძალიან კარგად ითამაშეს პეპემ, რონალდუმ, ბენზემამ და უკლებლივ ყველა მოთამაშემ.

უმნიშვნელოვანესი გამარჯვება მოვიპოვეთ და მეტოქესთან ჩამორჩენა შევამცირეთ. ეს იყო ჩვენი მიზანი, რომლის შესრულებითაც კმაყოფილი ვარ.

ბეილი გუნდის საკვანძო ფიგურაა და ის ითამაშებს, თუმცა იმას არ ნიშნავს, რომ სხვა მოთამაშეებს მნიშვნელოვანი როლი არ აქვთ. ვფიქრობ, რომ ასეთი ფეხბურთელები ჩემს გუნდში 11-ზე მეტია”, - განაცხადა იტალიელმა დამრიგებელმა.

შეგახსენებთ, რომ “რეალი” 9 ტურის შემდეგ ლა ლიგაში 21 ქულით მე-2 ადგილზე იმყოფება.