იტალიის ეროვნულ ნაკრებს ნოემბრის თვეში გასამართ მატჩებში "ლივერპულის" თავდამსხმელი მარიო ბალოტელი და ტურინის "იუვენტუსის" მცველი ანჯელო ოგბონა ვერ დაეხმარებიან.
24 წლის ფორვარდს მუხლქვედა მყესების მცირე ტრავმა აწუხებს და ლივერპულში გაემგზავრა, რათა კლუბის ექიმების მეთვალყურეობის ქვეშ იყოს. ანტონიო კონტემ ბალოტელი ნაკრებში მისი მწვრთნელობის პერიოდში პირველად გამოიძახა, თუმცა იტალიელი ამ შანსს ვერ გამოიყენებს.
რაც შეეხება ტურინელთა 26 წლის მცველს, ოგბონას კუნთების პრობლემები აწუხებს და საერთაშორისო მატჩებში "სკუადრა აძურას" ვერ დაეხმარება.
იტალიის ნაკრები 16 ნოემბერს მილანში "სან სიროზე" ხორვატიასთან ევროშესარჩევის მატჩს გამართავს, ხოლო ორ დღეში ალბანეთს გენუაში ამხანაგურად დაუპირისპირდება.
