ტურინის „იუვენტუსის“ ჩილელმა ნახევარმცველმა არტურო ვიდალმა კიდევ ერთხელ უარყო გავრცელებული ხმები მასსა და კლუბს შორის არსებული კონფლიქტის შესახებ.

როგორც ჩილელმა ფეხბურთელმა გუშინ საღამოს „ტვიტერის“ საკუთარ გვერდზე განაცხადა, „ბებერი ქალბატონის“ ხელმძღვანელობასთან ძველებურად კარგი ურთიერთობა აქვს.

„კლუბთან ძალიან კარგი ურთიერთობა მაქვს. ინფორმაცია, თითქოს დამაჯარიმეს, სიმართლეს არ შეესაბამება. მუხლი აღარ მტკივა და ყველაფერს ვაკეთებ ძველი ფიზიკური კონდიციების დასაბრუნებლად, რათა ასი პროცენტით დავეხმარო ჩემს კლუბსა და ნაკრებს“ - აღნიშნა ვიდალმა.

არტურო ვიდალი ტურინში სამი წლის წინათ „ლევერკუზენიდან“ გადაბარგდა და მას შემდეგ გუნდის ნამდვილ ლიდერად ჩამოყალიბდა. ამ ზაფხულს მის სახელს აქტიურად უკავშირებდნენ ლუის ვან გაალის „მანჩესტერ იუნაიტედს“, თუმცა ფეხბურთელმა იტალიაში დარჩენა ამჯობინა. ბოლო პერიოდში კი ხშირად ვრცელდება ხმები მასსა და კლუბს შორის არსებული უთანხმოების შესახებ.

გიორგი მელქაძე