საფრანგეთის ნაკრების მთავარმა მწვრთნელმა დიდიე დეშამმა სომხეთთან გამართული ამხანაგური მატჩის (3:0) შემდეგ განაცხადა, რომ მის გუნდს მეტოქემ პირველ ტაიმში ბევრი პრობლემა შეუქმნა. დეშამის თქმით, სომხეთს საკმაოდ კარგი გუნდი ჰყავს და რეალური შანსი აქვს ევრო 2016-ის საკვალიფიკაციო ეტაპი წარმატებით გადალახოს.

“კარგია, რომ სამი გოლი გავიტანეთ და არც ერთი გავუშვით. პირველ ტაიმში უკეთ უნდა გვეთამაშა. სომხეთის ნაკრები დინამიურ ფეხბურთს თამაშობდა, მათ შექმნეს რამდენიმე საგოლე მომენტი. პირველ ტაიმში სომხეთმა შთამბეჭდავად ითამაშა. განსაკუთრებით ბევრი პრობლემა სამმა შემტევმა შეგვიქმნა. გუნდს ეტყობოდა, რომ სამი დღის წინ რთული მატჩი ჰქონდა ჩატარებული სერბეთთან, სადაც მოგებას იმსახურებდა.” – ციტირებს დიდიე დეშამის სიტყვებს sport.news.an

სომხეთმა ევრო 2016-ის შესარჩევ ეტაპზე ორი მატჩი ჩაატარა. სერბებთან შინ 1:1 ითამაშა, ხოლო მეორე შეხვედრაში დანიასთან გასვლაზე 1:2 დამარცხდა.