საქართველოს ჩემპიონი თბილისის „იბერია“ ევროპა ლიგის მესამე საკვალიფიკაციო ეტაპის პირველ მატჩში ჩრდილოეთ ირლანდიის ჩემპიონი „ლარნს“ ესტუმრა და ნულოვან ფრეს დასჯერდა.

„იბერია“ პრობლემებით ჩავიდა ბელფასტში, დაგვიანებით, თანაც, ნაწილ-ნაწილ. შედეგად, ფრე, შედეგობრივად, ურიგო არ არის, მაგრამ სხვა საკითხია თამაშის ხარისხი.

ანდრეი დემჩენკოს გუნდს არ გამოუვიდა მაღალი დონის ჩვენება და მეტოქე უფრო ახლოს იყო გოლთან, ვიდრე თვითონ, მაგრამ საბოლოოდ, ფრე 0:0. ეს კი, იმას ნიშნავს, რომ ერთ კვირაში, ყველაფერი თბილისში გადაწყდება, სადაც გუნდები საპასუხო შეხვედრას ჩაატარებენ.

შეგახსენებთ, რომ „იბერია“ ამ ბარიერის დაძლევით, ევროპა ლიგის პლეი-ოფში გავა და ყველაზე ცუდ შემთხვევაში, კონფერენს ლიგის ფაზის ეტაპზე თამაშს გაინაღდებს. საპასუხო მატჩი 11 აგვისტოს გაიმართება.