27 ივნისიდან 18 ივლისის ჩათვლით, საქართველო მსოფლიო რაგბის ახალგაზრდულ ჩემპიონატს მეორედ უმასპინძლებს. 2017 წელს თბილისსა და ქუთაისში გამართულმა ჩემპიონატმა, დღემდე ჩატარებულ ტურნირებს შორის, მსოფლიო რაგბისგან საუკეთესო შეფასება დაიმსახურა.
წელს ახალგაზრდულ ჩემპიონატში მონაწილე გუნდების რაოდენობა 12-იდან 16-მდე გაიზარდა და შედეგად, როგორც თბილისში, ასევე ქუთაისში, ქომაგს 20-20 უმაღლესი დონის თამაშის ხილვის შესაძლებლობა ექნება. ერთმანეთს შეერკინებიან მსოფლიო რაგბის 16 წამყვანი ქვეყნის 20-წლამდელთა ნაკრებები, რომლებიც დაკომპლექტებული არიან იმ ამომავალი ვარსკვლავებით, რომლებიც მომავალში არაერთ დაუვიწყარ წუთს გვაჩუქებენ - უკვე კაცთა რაგბში!
2008 წელს დაარსებულმა 20-წლამდელთა ჩემპიონატმა, ელიტურ რაგბს უკვე გამოუწრთო 500-ზე მეტი უმაღლესი დონის მორაგბე. მათგან რამდენიმე ათეული მოთამაშე, საკუთარი ჯადოქრობით სამუდამოდ იპყრობს ქომაგთა გულებს და კვირიდან კვირამდე ამყოფებს მათ მუდმივი მოლოდინის რეჟიმში, რათა კიდევ ერთხელ იხილონ თავიანთი კუმირის მორიგი გაელვება.
მომავალი ვარსკვლავების ახალი ტალღა, 16 ქვეყნის ჯამში 500-მდე მორაგბე, საერთაშორისო ასპარეზზე პირველად სწორედ ქართველი ქომაგის წინაშე, თბილისსა და ქუთაისში გაიბრწყინებს! არ გაუშვა ხელიდან ეს შესანიშნავი შესაძლებლობა!
აშშ
აშშ-ს 20-წლამდელთა ნაკრები მსოფლიო რაგბის ახალგაზრდულ ჩემპიონატში მესამედ თამაშობს. ის გ ჯგუფში არგენტინასთან, ინგლისთან და ირლანდიასთან მოხვდა.
ჯგუფური ეტაპის შეხვედრებს აშშ თბილისში, “ავჭალაზე” გამართავს და 27 ივნისს, 13:00 საათზე არგენტინას; 2 ივლისს 18 საათზე ინგლისს; ხოლო 7 ივლისს 13 საათზე ირლანდიას ეთამაშება, რის შემდეგაც, ჯგუფში დაკავებული ადგილის მიხედვით, შესაბამის ფლეი ოფში (ნახევარფინალი და ფინალი) გადაინაცვლებს.
მსოფლიო რაგბის ახალგაზრდულ ჩემპიონატზე აშშ-ს წინა ორი გამოსვლა წარუმატებელი აღმოჩნდა. 2008 და 2013 წლებში, მან ყველა თამაში დათმო და ორივეჯერ ალაფაზე დაქვეითდა. გუნდს ალაფა ერთხელ, 2012 წელს აქვს მოგებული, ორჯერ (2009 და 2024) კი ფინალში დამარცხდა.
აშშ-ს 20-წლამდელთა ნაკრებმა პირველი ოფიციალური შეხვედრა 2008 წელს ჩაატარა და სამხრეთ აფრიკასთან 18:108 დამარცხდა. ყველაზე დიდი სხვაობით ამერიკელებმა კაიმანის კუნძულები 2009 წელს, 64:15 დაამარცხეს, თავად კი 2013 წელს ინგლისთან - 0:109 დამარცხდნენ.
აშშ-ში რაგბის თამაში მე-19 საუკუნის 70-იან წლებში დაიწყეს. სპორტის ეს სახეობა განსაკუთრებით პოპულარული იყო უნივერსიტეტებსა და კოლეჯებში. 1920 და 1924 წლებში, აშშ-ს ნაკრებმა ანტვერპენისა (ბელგია) და პარიზის (საფრანგეთი) ზაფხულის ოლიმპიადებზე ითამაშა და ორივე ჯერზე ოქროს მედლებს დაეუფლა (ფინალში ორივეჯერ საფრანგეთი დაამარცხა).
მაგრამ ამის შემდეგ აშშ-ში რაგბი თითქმის სრულად ჩაანაცვლა ამერიკულმა ფეხბურთმა და მისი აღორძინება მე-20 საუკუნის 60-70-იან წლებში დაიწყო, 1975 წელს აშშ-ს რაგბის კავშირი დაარსდა.
აშშ-ს ეროვნულმა ნაკრებმა პირველი საერთაშორისო შეხვედრა 1912 წელს ავსტრალიასთან გამართა. 114-წლიანი ისტორიის განმავლობაში „არწივებმა“ სარეკორდო სხვაობით 2006 წელს, ბარბადოსთან გაიმარჯვა - 91:0, თავად კი 1999 წელს ინგლისთან დამარცხდა - 8:106.
1987 წლიდან დღემდე, აშშ-მ 8-ჯერ ითამაშა მსოფლიო თასზე (1987, 1991, 1999, 2003, 2007, 2011, 2015, 2019) და გამოტოვა მხოლოდ ორი (1995, 2023). მსოფლიოს უმაღლეს ფორუმზე აშშ-ს არასდროს დაუძლევია ჯგუფური ეტაპი და 8 ტურნირის ჯამში ჩატარებული 29 თამაშიდან, მოიგო მხოლოდ სამი - თითო-თითო 1987, 2003 და 2011 წლებში.
მოცემული მომენტისთვის აშშ-ში 2500-ზე მეტი სარაგბო კლუბი 125 000-ზე მეტი მორაგბეა რეგისტრირებული. „არწივები“ მსოფლიო რეიტინგში 68.26 ქულით მე-16 პოზიციაზეა.
RUGBY.GE
