ბრუკლინ ბექემმა, „მანჩესტერ იუნაიტედისა“ და ინგლისის ნაკრების ყოფილი ნახევარმცველის, დევიდ ბექემის უფროსმა ვაჟმა, სოციალურ მედიაში მშობლები გააკრიტიკა ოჯახის მედიაში გადაჭარბებული პოპულარობის გამო.
დევიდისა და ვიქტორიას 26 წლის უფროსმა ვაჟმა განცხადება გაავრცელა, სადაც ნათქვამია, რომ ის უარს ამბობს ოჯახთან შერიგებაზე და ცხოვრებაში პირველად იცავს საკუთარ უფლებებს.
„წლების განმავლობაში ჩუმად ვიყავი და ვცდილობდი, ეს საკითხები კონფიდენციალურად შემენახა. სამწუხაროდ, ჩემი მშობლები და მათი გუნდი ამის შესახებ მედიაში ავრცელებენ ინფორმაციას, რაც სხვა გზას არ მიტოვებს, გარდა იმისა, რომ საკუთარი თავის სახელით ვისაუბრო და სიმართლე მხოლოდ გამოქვეყნებული ზოგიერთი სიცრუის შესახებ ვთქვა. არ მინდა ჩემს ოჯახთან შერიგება.
არავინ მაკონტროლებს და ცხოვრებაში პირველად ვიცავ ჩემს უფლებებს. სოციალურ მედიაში თვალშისაცემი პოსტები, ოჯახური ღონისძიებები და არაგულწრფელი ურთიერთობები იმ ცხოვრების განუყოფელი ნაწილი იყო, რომელშიც დავიბადე“, - დაწერა ბრუკლინ ბექემმა თავის სოციალურ ქსელში.
მან ასევე გააკრიტიკა მამამისი და განაცხადა, რომ დიდ ბრიტანეთში დევიდის 50 წლის იუბილეს აღსანიშნავად ჩავიდა, მაგრამ შეხვედრის თხოვნები მხოლოდ იმ შემთხვევაში დაკმაყოფილდებოდა, თუ ბრუკლინის მეუღლე ნიკოლა პელცს არ მიიწვევდნენ.
ადრე გავრცელდა ინფორმაცია, რომ ბრუკლინმა სოციალურ მედიაში მშობლები დაბლოკა. მიზეზი ის იყო, რომ მშობლების მიერ მისი პოსტების მოწონებამაც კი საჯაროდ გამოიწვია მისი და მისი ცოლის ურთიერთობის განხილვა. ბექემ უმცროსმა ასევე მოუწოდა მშობლებს, რომ მას მხოლოდ ადვოკატების მეშვეობით დაუკავშირდნენ.
