„პარი სენ-ჟერმენის“ ფეხბურთელის, ხვიჩა კვარაცხელიას შესანიშნავ თამაშს „რენის“ წინააღმდეგ ცნობილი ფრანგული გამოცემა Le Parisien-ი გამოეხმაურა.
ფრანგული გაზეთი იმედოვნებს, რომ ეს „კვარადონას“ საბოლოო გამოღვიძება იქნება მას შემდეგ, რაც სეზონის სტარტზე ლიგა 1-ში არასტაბილურად თამაშობდა:
"ეთან მბაპე ტრიბუნებზე და მოედანზე 7 ნომერი, რომელმაც "პარკ დე პრენსი" ფეხზე წამოაყენა. პსჟ-ს ყოფილი ახალგაზრდა ფეხბურთელი, რომელმაც გუშინ „ლილის“ რიგებში „მარსელის“ წინააღმდეგ გოლი გაიტანა, პარიზში იმყოფებოდა თავისი ბავშვობის კლუბის მხარდასაჭერად და სტადიონზე მან არა მისი უფროსი ძმა, არამედ 7 ნომერი იხილა წარმოუთქმელი გვარით, რომელმაც მბაპეს მაისური გასული წლის იანვარში მემკვიდრეობით მიიღო.
ხვიჩა კვარაცხელიამ 17 მაისს პსჟ-ოსერის მატჩის შემდეგ პარიზული მაისურით მეორე დუბლი შეასრულა და ლიგა 1-ში პსჟ-ს მეათე გამარჯვებაში ერთ-ერთი მთავარი მოთამაშე გახდა. ის გასული ზამთრიდან მოყოლებული ისეთ შთაბეჭდილებას ტოვებდა, რომ თითქოს, ყოველთვის პარიზულ გუნდში თამაშობდა, რადგან მისი ადაპტაცია ძალიან სწრაფი იყო, მაგრამ ამ სეზონის დასაწყისიდან ორი განსხვავებული მხარე აჩვენა.
ერთი მხარე საკმაოდ კარგი იყო ჩემპიონთა ლიგაზე, სადაც ოთხ მატჩში ორი გოლითა და ორი საგოლე გადაცემით, ის თითქმის ყველა თამაშში გადამწყვეტი იყო. მეორე, ნაკლებად კარგი: ლიგა 1-ში, სადაც სეზონის დაწყების შემდეგ არასტაბილურად თამაშობდა. "ვერ ვხედავ განსხვავებას ლიგა 1-სა და ჩემპიონთა ლიგას შორის", - განაცხადა ლუის ენრიკემ პარასკევს პრესკონფერენციაზე ქართველი თავდამსხმელის ორგვარ ფორმასთან დაკავშირებით. "ძალიან კმაყოფილი ვარ მისი თამაშით. ის უმაღლეს დონეზეა, ამბიციურია. სეზონის განმავლობაში ყველა მოთამაშე განიცდის აღმასვლას და ჩავარდნას". "პარკ დე პრენსზე" 2025 წლის ბოლო მატჩში ქართველმა ფეხბურთელმა, უდავოდ, სეზონის პირველ ნახევარში საუკეთესო თამაში აჩვენა. კვარა ჩემპიონთა ლიგის ფორმაში, ისეთივე კარგი, როგორიც ევროტურნირის პირველ მატჩში, როცა ატალანტას წინააღმდეგ ბრწყინავდა.
„რენთან“ შესანიშნავი დრიბლინგით გატანილმა გოლმა კიდევ უფრო გახსნა მოთამაშე, რომელიც ისედაც პსჟ-ს ყველაზე სახიფათო ფეხბურთელი იყო. კარგი ამბავი პსჟ-სთვის და კოშმარი „რენისთვის“, რომელიც უძლური იყო ქართველი ფეხბურთელის დინამიკის წინააღმდეგ. მას შემდეგ, რაც მისი პასებით მაიულუმ და დემბელემ ვერ გაიტანეს, მან თავად გადაწყვიტა ანგარიშის გახსნა მაიულუს იდეალური გადაცემის შემდეგ, ძლიერი დარტყმით. ეს მის კარიერაში მე-10 დუბლი იყო, მართლაც საშობაო საჩუქარი, იმ პირობით, რომ ეს "კვარადონას" საბოლოო გამოღვიძება იქნება", - წერს გამოცემა.
ხვიჩა კვარაცხელიამ მიმდინარე სეზონში „პარი სენ-ჟერმენის“ მაისურით 18 მატჩში 5 გოლი გაიტანა და 5 საგოლე პასი გააკეთა, ხოლო კონკრეტულად ლიგა 1-ში მისი მონაგარი 13 მატჩში 3 გოლი და 3 ასისტია.
„პარი სენ-ჟერმენი“ ლიგა 1-ში 33 ქულით მეორე ადგილზეა და ქულით ჩამორჩება „ლანსს“, მომდევნო ტურში კი 13 დეკემბერს, „მეცს“ ესტუმრება, მაგრამ მანამდე ჩემპიონთა ლიგაზე 10 დეკემბერს, „ბილბაოს“ ესტუმრება.
