ბულგარეთის ნაკრების ფეხბურთელმა გეორგი რუსევმა საქართველოს ნაკრებთან მატჩამდე პრესკონფერენციაზე ისაუბრა.

მან აღნიშნა, რომ ხვიჩა კვარაცხელია ვარსკვლავია, მაგრამ ამას არ აქვს მნიშვნელობა და ისინი მოედანზე მოგებისთვის გავლენ:

„სტატისტიკა არ არის მნიშვნელოვანი, ჩვენი თამაშია მნიშვნელოვანი. საქართველო მაღალი კლასის გუნდია, კარგი ფეხბურთელებით, რომლებიც ბოლო დროს ძალიან განვითარდნენ. დიდი ვარსკვლავი ჰყავთ, ხვიჩა კვარაცხელია, რომელიც ჩემს პოზიციაზე ერთ-ერთი საუკეთესოა. მან ჩემპიონთა ლიგა „პარი სენ-ჟერმენთან“ ერთად მოიგო. თუმცა, ეს ახლა მნიშვნელოვანი აღარ არის. მნიშვნელოვანია, რომ მობილიზებულები ვიყოთ და ხვალინდელ მატჩში გავიმარჯვოთ.

ყოველთვის სასიამოვნოა, როდესაც სავსე ტრიბუნების წინაშე თამაშობ, როგორც ეს თურქეთის წინააღმდეგ იყო. განადგურება - არ მგონია, რომ სწორი სიტყვა იყოს. თუმცა, უარყოფითი შედეგები ზეწოლას ახდენს. არავის უყვარს წაგება, განსაკუთრებით ამ დონის სპორტსმენებს. ეს კი ჩვენზე ზეწოლას ახდენს“, - თქვა რუსევმა.

შეგახსენებთ, რომ საქართველოს ნაკრები ჯგუფში 3 ქულით მესამე ადგილზეა და ჯგუფიდან გასვლის შანსი დაკარგული აქვს, ხოლო წლის ბოლო მატჩს ბულგარეთთან 18 ნოემბერს, თბილისის დროით 23:45 საათზე გამართავს. საქართველოს ნაკრებს ბულგარეთთან ბოლო სამი მატჩი არ წაუგია (2 მოგება, 1 ფრე), მაგრამ ჯამში უპირატესობა მეტოქეს აქვს - 4 მოგება (ბულგარეთი), 2 ფრე, 3 მოგება (საქართველო).