გერმანიის ნაკრებმა იტალიის ნაკრების წინააღმდეგ ძალიან კურიოზული გოლი გაიტანა, უფრო სწორად, იტალიამ გაუშვა კურიოზული და შეიძლება ითქვას, სასაცილო გოლი.

36-ე წუთზე იოზია კიმიხმა კუთხური მოულოდნელად გაათამაშა, იტალიის ნაკრების ფეხბურთელები საერთოდ არ უყურებდნენ მომენტს, ჯანლუიჯი დონარუმასაც კარი დატოვებული ჰქონდა, რითაც კიმიხმა ისარგებლა და ჯამალ მუსიალას ცარიელ კარში გაატანინა.

თუმცა, ეს გოლი არ იქნებოდა, რომ არა 15 წლის ნოელ ურბანიაკი, რომელმაც პირველად იმუშავა ბურთის მიმწოდებლად, დიდებული დებიუტიც გამოუვიდა. სწორედ ის გაერკვა სიტუაციაში სწრაფად, ბურთი დროულად მიაწოდა კიმიხს და დანარჩენი ისტორიაა.

მატჩის შემდეგ ნოელმა კიმიხსგან საჩუქრად ავტოგრაფი და ბურთი მიიღო. ბიჭმა კი, თქვა, რომ შოკში იყო:

"კიმიხთან ვიზუალური კონტაქტი მქონდა, ბურთი მივაწოდე და მან მუსიალას პასი გაუკეთა. 2-3 წუთის შემდეგ დედაჩემმა და მამაჩემმა მომწერეს, რომ ტელევიზორში მაჩვენეს, შოკში ვიყავი, არ მჯეროდა, ეს ყველაფერი სიგიჟე იყო. თამაშის შემდეგ კიმიხთან კონტაქტი ცოტა ხნით მქონდა, ბურთზე ხელი მომიწერა და მადლობა გადამიხადა. ჩემი დებიუტი არასდროს დამავიწყდება“, - აღნიშნა ნოელმა გერმანულ მედიასთან.

შეგახსენებთ, რომ გერმანია იტალიას პირველი ტაიმის შემდეგ 3:0-ს ამარცხებდა, თუმცა, იტალიელებმა მეორე ტაიმში ანგარიში გაათანაბრეს და შეხვედრა 3:3 დასრულდა. თუმცა, ორი მატჩის ჯამში გამარჯვება გერმანიამ მოიპოვა - 5:4 (2:1, 3:3) და ერთა ლიგის ნახევარფინალში გავიდა.