სომხეთის ნაკრების მთავარმა მწვრთნელმა ჯონ ვან ტ’სხიპმა საქართველოსთან მატჩამდე პრესკონფერენცია გამართა. მან გიორგი მიქაუტაძეზეც ისაუბრა, რომლის მთავარი მწვრთნელი ამსტერდამის „აიაქსში“ იყო.

„საქართველოს ნაკრებმა ბოლო წლებში შესანიშნავი ნაბიჯები გადადგა წინ. მის წინააღმდეგ თამაში მომიწია, როცა საბერძნეთის ნაკრებში ვმუშაობდი. ეს ჩვენთვის კარგი გამოწვევაა. საქართველოს შესანიშნავი ტალანტები ჰყავს, ევროპის ჩემპიონატზეც ითამაშა. ეს ჩვენთვის კარგი მოტივაციაა საქართველოს ნაკრები განვითარდა და საქართველომ გადადგა ნაბიჯი და ვფიქრობ, ეს ძალიან კარგი მაგალითია ჩვენნაირი პატარა ქვეყნებისთვის.

სამწუხაროდ, „აიაქსში“ მიქაუტაძეს ბევრ დროს ვერ ვაძლევდი ან სხვადასხვა პოზიციაზე უწევდა თამაში, რადგან ფორვარდის პოზიციაზე ბრობი და ჩუბა აკპომი იყვნენ. შემდეგ „აიაქსმა“ ზამთარში კარგი შეთავაზება მიიღო და ვფიქრობ, ორივე მხარისთვის კარგი გამოსავალი იყო, რომ ის საფრანგეთში დაბრუნდა. მიხარია, რომ „ლიონში“ ისევ მაღალ დონეზე თამაშობს და კარგი დრო უდგას.

მზად ვართ ხვალ კარგი მატჩისთვის ჩასატარებლად, რა თქმა უნდა, დადებითი შედეგის მიღწევა ჩვენი მიზანია, პროფესიონალები ვართ და ცხადია, ეს გვინდა, თუმცა, ვიცით, რომ ადვილი არ იქნება. სამწუხაროდ, რამდენიმე ფეხბურთელი გვაკლია, მათ შორის, სელარიანი და სპერციანი, მაგრამ ეს სხვებისთვის შანსია და მზად ვართ, ძალიან კარგი თამაშის ჩასატარებლად.

"სომხეთზე ჩემი პირველი შთაბეჭდილებები ძალიან კარგია. ძალიან მომეწონა ერევანი, სომხური კერძები ძალიან გემრიელია, ამინდიც კარგი იყო დღემდე. რაც შეეხება პირველ შთაბეჭდილებებს სომეხი ფეხბურთელებზე, პირველივე დღიდან დავინახე დიდი თავდადება, სურვილი და მისწრაფება კარგი შედეგების მისაღწევად.

ჯერ არ მქონია ბევრი დრო იმისათვის, რომ კარგად გავიცნო ფეხბურთელები, ახლახან გვქონდა ჩვენი პირველი ვარჯიში, ამ სეზონის პირველ მატჩს ვთამაშობთ, მაგრამ ამ დღეებში ბევრი თავდადება და დადებითი განწყობა დავინახე.

ჩვენი მთავარი მიზანია კარგად მოვემზადოთ სექტემბერში დასაწყები მსოფლიო ჩემპიონატის საკვალიფიკაციო ეტაპის მატჩებისთვის. ამ დროისთვის კი ჩვენი მიზანია ხვალინდელ მატჩში კარგად გამოვიდეთ, საქართველოს ნაკრები პრობლემები შევუქმნათ და კარგი შედეგი დავაფიქსიროთ. ჩვენ პატარა ქვეყანა ვართ და ხვალინდელი მატჩი ჩვენთვის კარგი გამოწვევაა“, - თქვა ვან ტ’სხიპმა.

პრესკონფერენციაზე ასევე კომენტარი გააკეთა სომხეთის ნაკრების ფეხბურთელმა ვარაზდათ აროიანმა:

„საქართველოს ნაკრების ფეხბურთელებზე ბევრი რამ მსმენია. ისინი კარგად ვითარდებიან, ევროპის ჩემპიონატზეც გავიდნენ, რასაც ვულოცავ. ხვალ ძალიან კარგ მატჩს ველოდებით, რომელსაც დიდი მოლოდინით და ამბიციით ვხვდებით, თამაშს მოუთმენლად ველოდებით. ყველაფერს გავაკეთებთ მოსაგებად“.

საქართველოსა და სომხეთის ორმატჩიანი დაპირისპირებით ირკვევა, ვინ ითამაშებს ერთა ლიგის მომდევნო სეზონში B ლიგაში და ვინ C ლიგაში. ორი მატჩის გამარჯვებული B დივიზიონში იქნება, ხოლო დამარცხებული შესაბამისად, C დივიზიონში.

საქართველოს ნაკრებმა ერთა ლიგის გასულ სეზონში ჯგუფში 7 ქულით მესამე ადგილი დაიკავა და სწორედ ამიტომ უწევს დასარჩენ პლეი-ოფში თამაში. პირველი შეხვედრა 20 მარტს, 21:00 საათზე ერევანში შედგება, ხოლო საპასუხო 23 მარტს, 18:00 საათზე თბილისში, „დინამო არენაზე“.