ქუთაისის „ტორპედომ“, რომელიც სეზონის წინ ბერის აზრით, მთავარი ფავორიტი იყო, ეროვნულ ლიგაში ძალიან ცუდი სტარტი აიღო და ზედიზედ მესამე მარცხი განიცადა.

დირკ შუსტერის გუნდი მეოთხე ტურში საკუთარ მოედანზე გორის „დილასთან“ 1:2 დამარცხდა. მატჩის დასაწყისში გუნდებმა ლამაზი გოლები გაცვალეს: ჯერ ირაკლი ბუღრიძემ დააწინაურა სტუმრები, მერე პაატა ღუდუშაურმა აღადგინა წონასწორობა.

თუმცა, გადამწყვეტი იბრაჰიმა დრამეს გოლი იყო, რომელმაც 86-ე წუთზე გაიტანა გამარჯვების გოლი და „დილამ“ სეზონში პირველი თამაში მოიგო.

გორის „დილას“ სამ მატჩში 4 ქულა აქვს, მეხუთე ადგილზეა და მომდევნო ტურში „თელავს“ შეხვდება, ხოლო „ტორპედოს“ ოთხ მატჩში მხოლოდ 3 ქულა გააჩნია, მეშვიდეა და წინ „დინამო ბათუმთან“ შეხვედრა ელოდება.

ვერ მოიგო „დინამო თბილისმაც“, რომელიც სტუმრად „თელავს“ დაუზავდა. მასპინძლები დაჩი ცნობილაძემ დააწინაურა, რასაც მე-13 წუთზე თორნიკე მორჩილაძის გაძევება მოჰყვა და „დინამოს“ თითქმის მთელი მატჩის განმავლობაში რიცხობრივ უმცირესობაში ყოფნა მოუწია. თუმცა, ქულა მაინც გადაარჩინა, რადგან 24-ე წუთზე მათე ვაწაძემ გაიტანა და მერე არაფერი შეცვლილა.

„დინამო თბილისს“ სამ ტურში 5 ქულა აქვს, მეოთხე საფეხურზეა და „გარეჯთან“ მატჩი ელოდება, ხოლო „თელავმა“ ოთხ მატჩში 7 ქულა მოიპოვა და მეორე ადგილზეა, ხოლო მომდევნო ტურში „დილას“ დაუპირისპირდება.

„თელავი“ – „დინამო თბილისი“ 1:1 (1:1)

გოლები: 1:0 ცნობილაძე (6), 1:1 ვაწაძე (24)

„ტორპედო“ – „დილა“ 1:2 (1:1)

გოლები: 0:1 ბუღრიძე (15), 1:1 ღუდუშაური (18), 1:2 დრამე (86)