საუდის არაბეთის კლუბმა მადრიდის „რეალის" გარემარბ ვინისიუს ჟუნიორს შესთავაზა ხუთწლიანი კონტრაქტი 1 მილიარდი ევროს ანაზღაურებით შეთანხმების მთელი პერიოდის განმავლობაში - წერს ესპანური გამოცემა AS.

წყაროს ცნობით, საუდურ კლუბს სურს მადრიდელებს 300 მილიონი ევრო შესთავაზოს ვინისიუსის ტრანსფერისთვის და კონტრაქტი წელიწადში 200 მილიონი ევროს ოდენობით. აღნიშნულია, რომ „რეალს“ არ სურს ფეხბურთელის გაყიდვა 1 მილიარდ ევროზე ნაკლებ ფასად, თუმცა, მადრიდული კლუბის ხელმძღვანელობა დათანხმდება შემოთავაზებას, თუ თავად ფეხბურთელი გამოთქვამს ესპანეთის დედაქალაქის დატოვების სურვილს.

ადრე გავრცელდა ინფორმაცია, რომ ბრაზილიელი ამჟამად აპირებს მადრიდულ კლუბში დარჩენას, მიუხედავად იმისა, რომ მის მიმართ „ალ-ჰილალი“ და „ალ-ნასრი“ დაინტერესდნენ.

მიმდინარე სეზონში ვინისიუსმა ყველა ტურნირზე 26 მატჩი ჩაატარა, 16 ბურთი გაიტანა და 10 საგოლე გადაცემა შეასრულა. ფეხბურთელის მოქმედი კონტრაქტი კლუბთან 2027 წლის ზაფხულამდეა გათვლილი.