„პარი სენ-ჟერმენში“ ხვიჩა კვარაცხელიას დებიუტი შედგა. „რეიმსის“ წინააღმდეგ ქართველმა ფეხბურთელმა თავი საგოლე პასით გამოიჩინა, თუმცა პსჟ-მ ქულები მაინც დაკარგა.

კვარაცხელია მატჩის შემდეგ L’Equipe-ს პირველ შთაბეჭდილებებზე ვრცლად ესაუბრა.

- „პარკ დე პრენსზე“ პირველი მატჩი, როგორი შთაბეჭდილებები დაგრჩათ?

- წარმოუდგენელი გრძნობა იყო. ძალიან კარგი ატმოსფერო. ძალიან ბედნიერი ვარ, რომ აქ ვარ, ამ გულშემატკივრებთან, ამ გუნდთან, ამ წარმოუდგენელ ფეხბურთელებთან ერთად.

- როგორ გრძნობდით თავს მოედანზე?

- კარგად. რთული მატჩი იყო. იყო შანსები, სადაც უნდა გაგვეტანა, ბევრი შანსი ხელიდან გავუშვით. ამით აიხსნება, რომ მხოლოდ ქულა მოვიპოვეთ.

- უსმან დემბელეს გაატანინეთ, რას გრძნობთ?

- ძალიან ბედნიერი და ამაყი ვარ, რომ იმ მომენტში საგოლე გადაცემა გავაკეთე. ცოტა იმედგაცრუებული ვარ, რადგან დღეს უნდა მოგვეგო, მაგრამ ჩვენ უფრო მეტს ვიმუშავებთ და მომდევნო მატჩებში გავიმარჯვებთ.

- ფიზიკურად როგორ ხართ?

- კარგად. უბრალოდ, ერთი თვეა არ მითამაშია. ვფიქრობ, ამიტომაც ცოტა გამიჭირდა, მაგრამ მწვრთნელი და პერსონალი მეხმარებიან, მეტი ვიმუშაო ოპტიმალურ ფორმაში დასაბრუნებლად. გავაგრძელებ მუშაობას, რომ საუკეთესო ფორმაში შევიდე.

- რამდენიმე პოზიციაზე ითამაშეთ. როგორ ფიქრობთ, რომელია თქვენთვის საუკეთესო?

- ვფიქრობ, შეტევაში ნებისმიერ პოზიციაზე თამაში შემიძლია. ჩვენ შეგვიძლია ვითამაშოთ ყველა პოზიციაზე (ერთ მატჩში). ძალიან სასიამოვნოა, როცა მოედანზე თავს თავისუფლად გრძნობ, როცა კართან ახლოს ხარ. მთავარი გუნდის სტრატეგიაა.

- როგორი იყო პირველი კვირა პსჟ-ში?

- კარგი. ფეხბურთელები და კლუბი განსაკუთრებულად ზრუნავდნენ ჩემზე. მეუბნებოდნენ: "უბრალოდ იფიქრე ვარჯიშზე, დანარჩენზე ჩვენ ვიზრუნებთ". ბედნიერი ვარ, რომ აქ ვარ, ეს ჩემთვის მნიშვნელოვანია.

- ახლა, გინდათ, რომ პსჟ-ს ჩემპიონთა ლიგის მომდევნო ეტაპზე გავიდეს...

- რა თქმა უნდა, დიახ. მე ვიყავი მათი პირველი გულშემატკივარი "მანჩესტერ სიტის" წინააღმდეგ, ეს იყო შესანიშნავი მატჩი, წარმოუდგენლად ვითამაშეთ, დავიმსახურეთ მოგება. რთული მატჩი იყო, მაგრამ ჩვენი ხარისხი ვაჩვენეთ.

- შტუტგარტთან მაინც რთული თამაში იქნება...

- ჩემპიონთა ლიგაზე იოლი მატჩი არ არსებობს. მოვემზადებით.

- გუნდთან ერთად წახვალთ გერმანიაში?

- მე ასე მგონია. თუ ნებას მომცემენ, იქ ვიქნები.

- როგორია იმავე ჩემპიონატში თამაში, რომელშიც გიორგი მიქაუტაძე (ლიონი) და ზურიკო დავითაშვილი (სენტ ეტიენი) თამაშობენ?

- ბედნიერი ვარ. ისინი ჩემი მეგობრები არიან, ჩვენ ძალიან ახლოს ვართ და ახლა უკვე მეტოქეებიც. როდესაც ნაკრებში ვიქნებით, შეიძლება ვიკამათოთ კიდეც (იღიმის - რედ).

შეგახსენებთ, რომ პსჟ-სა და „რეიმსის“ მატჩი 1:1 დასრულდა, პარიზელთა ერთადერთი გოლი უსმან დემბელემ სწორედ კვარაცხელიას პასით გაიტანა.

„პარი სენ-ჟერმენი“ მომდევნო მატჩს ჩემპიონთა ლიგაზე სტუმრად „შტუტგარტთან“ გამართავს, სადაც კვარაცხელიას თამაშის უფლება ჯერ არ აქვს, ხოლო ლიგა 1-ის მომდევნო ტურში პირველ თებერვალს, სტუმრად „ბრესტს“ შეხვდება. პსჟ ლიგა 1-ში 19 ტურის შემდეგ დაუმარცხებელია და 47 ქულით ლიდერია.