მადრიდის „ატლეტიკო“ შესანიშნავ ფორმაშია და ყველა ტურნირის გათვალისწინებით, ზედიზედ მე-14 მატჩი მოიგო.

დიეგო სიმეონეს გუნდმა ლა ლიგის მე-19 ტურში საკუთარ მოედანზე „ოსასუნა“ ხულიან ალვარესის გოლით 1:0 დაამარცხა. მადრიდულ გუნდს ლა ლიგაში ერთადერთი მარცხი აქვს ამ სეზონში, 27 ოქტომბერს, "ბეტისის" წინააღმდეგ, მას შემდეგ კი, ზოგადად, ყველა შეხვედრა მოიგო.

აღსანიშნავია, რომ ზედიზედ 14 მოგება "ატლეტიკოს" ისტორიაში სარეკორდო მაჩვენებელია.

„ატლეტიკო“ 44 ქულით ლიდერობს ლა ლიგას, ერთი ქულით უსწრებს „რეალს“ და 6 ქულით - „ბარსელონას“.