ტურინის „იუვენტუსმა“ სერია A-ს მიმდინარე სეზონში მე-12 ფრე ითამაშა (19 მატჩში), ბოლო 7 შეხვედრაში კი, მეექვსედ დაუზავდა მეტოქეს.
„იუვემ“ ამჯერად „ტორინოს“ ვერ აჯობა (1:1), აღსანიშნავია, რომ ხშირად ტურინელები ანგარიშში წინ გადიან, მაგრამ უპირატესობას ვეღარ ინარჩუნებენ. მთავარ მწვრთნელ ტიაგო მოტას უკვე ბევრი კრიტიკოსი ჰყავს, მაგრამ ის არ ფიქრობს, რომ მის გუნდს ცუდი შედეგი აქვს.
„მოედანზე ყოველთვის გამარჯვებისთვის გავდივართ, ფრეებით კმაყოფილი არ ვართ, ეს ცხადია. „ტორინოს“ ვაჯობეთ, მაგრამ შედეგი იმაზე მეტყველებს, რომ მეტოქეზე ერთით მეტი გოლის გატანა ვერ შევძელით.
დიახ, ბევრი ფრე გვაქვს, მაგრამ სეზონში ჩატარებული 27 მატჩიდან მხოლოდ 2 წავაგეთ. არ ვართ კმაყოფილი, მოგება უფრო ხშირად გვინდა, თუმცა, ახალგაზრდული შემადგენლობის და უამრავი ტრავმის მიუხედავად, რაც ჩვენთვის არასდროს ყოფილა ალიბი, მხოლოდ ორი წაგება გვაქვს ყველა ტურნირზე“, - თქვა ტიაგო მოტამ.
შეგახსენებთ, რომ „იუვენტუსი“ სერია A-ში ერთადერთი დაუმარცხებელი გუნდია (7 მოგება, 12 ფრე), მაგრამ მხოლოდ მეხუთე ადგილზეა და ბოლო 14 წლის განმავლობაში ასეთი ცუდი შედეგი არ ჰქონია. ყველა ტურნირზე „იუვე“ მხოლოდ ორჯერ დამარცხდა, „შტუტგარტის“ (ჩემპიონთა ლიგა) და „მილანის“ (იტალიის სუპერთასი) წინააღმდეგ.
