ლონდონის „ჩელსის“ მთავარმა მწვრთნელმა ენცო მარესკამ „იფსვიჩთან“ მარცხის (0:2) შემდეგ კომენტარი გააკეთა.

როგორც მან თქვა, სეზონის განმავლობაში ჩავარდნას ელოდნენ, რადგან ამის გარეშე სეზონის ჩატარება თითქმის შეუძლებელია:

„უცნაური თამაში იყო იმ მხრივ, რომ ბევრი მომენტი შევქმენით და შეგვეძლო გოლების გატანა, მაგრამ მათ ბურთი ხან კარის ხაზიდან გამოჰქონდათ, ხან მეკარე შესანიშნავად თამაშობდა. უკეთ თამაში შეგვეძლო. პენალტი ცოტა საკამათოა, მაგრამ უნდა შევეგუოთ, რომ დაინიშნა.

წინა თამაშთან შედარებით, ოთხი ცვლილება გავაკეთეთ, რადგან ყველა იმსახურებს თამაშს. არავინ ელოდა, რომ სეზონის პირველ ნაწილს იმ პოზიციაზე დავასრულებდით, სადაც ახლა ვართ. კარგ მდგომარეობაში ვართ, მაგრამ ბევრად უკეთესადაც შეგვიძლია. აქცენტს თამაშიდან თამაშამდე ვაკეთებთ და არ ვართ ორიენტირებული ჩემპიონობისთვის ბრძოლაზე. სეზონში ასეთ მომენტს ველოდით, ჩავარდნის გარეშე სეზონის ჩატარება თითქმის შეუძლებელია“, - თქვა მარესკამ.

შეგახსენებთ, რომ „ჩელსი“ ზედიზედ მეორედ დამარცხდა, ბოლო სამ ტურში მხოლოდ ქულა მოიპოვა და ამ დროისთვის მეოთხე ადგილზეა, „ლივერპულთან“ 10-ქულიანი ჩამორჩენით.