ინგლისის პრემიერლიგის მე-18 ტურში „ლივერპულმა“ „ლესტერ სიტი“ დაამარცხა და კონკურენტებთან უპირატესობა კიდევ უფრო გაზარდა.

არნე სლოტის გუნდმა „ჩელსის“ წაგებით მშვენივრად ისარგებლა. თუმცა, თამაში „მელიების“ სწრაფი გოლით დაიწყო, მეექვსე წუთზე ჯორდან აიუმ გახსნა ანგარიში. „წითლებმა“ ტაიმის ბოლოს, კოდი გაკპოს ეფექტური გოლით გაათანაბრეს, ხოლო მეორე ნახევრის დასაწყისში კერტის ჯონსმა წინ გაიყვანა „ლივერპული“.

საბოლოო ანგარიში 82-ე წუთზე დაფიქსირდა, როცა მოჰამედ სალაჰმა გამოიჩინა თავი და მასპინძლებმა 3:1 მოიგეს.

„ლივერპული“ 42 ქულით ლიდერია და 7 ქულით უსწრებს „ჩელსის“, თანაც თამაშით ნაკლები აქვს ჩატარებული, ხოლო მომდევნო ტურში 29 დეკემბერს, „ვესტ ჰემს“ ესტუმრება. „ლესტერი“ 14 ქულით გასავარდნ ზონაში, მე-18 პოზიციაზეა.