„ლიონის“ თავდამსხმელმა გიორგი მიქაუტაძემ საფრანგეთის თასზე „ფეინი ოუნოუასთან" გამარჯვების (2:1) და გოლის გატანის შემდეგ კომენტარი გააკეთა.
როგორც მან თქვა, გამარჯვება და გოლის გატანა ყოველთვის სასიამოვნოა.
„რთული მატჩი გამოდგა. ძალიან ცუდი პირველი ტაიმი ჩავატარეთ, მეორე კარგად დავიწყეთ, შემდეგ მეორე გოლიც გავიტანეთ, მაგრამ გამოჩნდა, რომ ისინი სახიფათოები იყვნენ და თამაშში დაბრუნება მოახერხეს. კარგი გუნდია, ვულოცავ მათ ამ თამაშს, ჩვენ კი, გვიხარია, რომ მომდევნო ეტაპზე გავედით.
მე და საიდ ბენრაჰმა ერთმანეთს კარგად ვუგებთ, მან პასი მომცა, მე გავიქეცი და მეკარეს ვუყურებდი. გოლის გატანა ყოველთვის კარგია“, - თქვა მიქაუტაძემ.
შეგახსენებთ, რომ გიორგი მიქაუტაძეს „ლიონის“ მაისურით ყველა ტურნირზე 21 მატჩში 7 გოლი აქვს გატანილი და ერთხელ საგოლე პასი მიითვალა (ლიგა 1-ში: 4 გოლი და 1 პასი, ევროპა ლიგაზე: 2 გოლი, საფრანგეთის თასზე: 1 გოლი).
„ლიონს“ მომდევნო მატჩი 2025 წელს ელოდება, 4 იანვარს, ლიგა 1-ში „მონპელიეს“ უმასპინძლებს.
