„ლივერპულის“ გარემარბის მოჰამედ სალაჰის მიერ ინგლისის ჩემპიონატის მე-16 ტურის „ფულემთან“ მატჩში (2:2) შესრულებული საგოლე პასი, მისთვის ყველა ტურნირზე მე-100 გახლდათ - გვამცნობს სტატისტიკური პორტალი Opta Sport.

ეგვიპტელმა ფეხბურთელმა ამ სეზონში 13 საგოლე გადაცემა მიითვალა, უფრო მეტი, ვიდრე პრემიერლიგის ნებისმიერმა სხვა მოთამაშემ 2024/2025 წლების სეზონში.

სალაჰი „ლივერპულში“ 2017 წლიდან თამაშობს. ამ პერიოდში მან ყველა შეჯიბრში 372 მატჩში მიიღო მონაწილეობა, რომლებშიც 227 გოლი გაიტანა. ფეხბურთელის ამჟამინდელი კონტრაქტი კლუბთან 2025 წლის ზაფხულამდეა ძალაში.