გერმანიის II ბუნდესლიგის მე-16 ტურში ბუდუ ზივზივაძის „კარლსრუემ“ „რეგენსბურგი“ 4:2 დაამარცხა, ქართველმა ფორვარდმა - დუბლი შეასრულა.

ბუდუს შესანიშნავი თამაში ჰქონდა. მან 45-ე წუთზე მოახერხა პირველი გოლის გატანა, რითაც იმ დროისთვის ანგარიში გაათანაბრა (1:1). მეორე ტაიმის პირველივე წუთზე ბუდუმ პენალტი მოიპოვა, რომელიც თავადვე დაარტყა, მაგრამ სამწუხაროდ, მეკარემ აჯობა და ანგარიში უცვლელი დარჩა. სამ წუთში სტუმრები მეორედ დაწინაურდნენ, რასაც 56-ე წუთზე მარსელ ვანიცეკმა უპასუხა, რომელმაც პენალტი შეაგდო - 2:2.

62-ე წუთზე ზივზივაძე მეკარესთან პირისპირ დარჩა და ამჯერად შეცდომა არ დაუშვია: დუბლიც გაიფორმა და თავისი გუნდი წინ გაიყვანა. ქართველს ჰეთ-თრიქის შანსიც ჰქონდა, თუმცა, მატჩის მიწურულს ოდნავ არაზუსტი დარტყმა გამოუვიდა. საბოლოო ანგარიში ფლორიან შლოიზენერმა დააფიქსირა, ხოლო ზივზივაძე 90-ე წუთზე შეცვალეს.

30 წლის ქართველი ფეხბურთელი II ბუნდესლიგაში ბომბარდირთა დავას ლიდერობს 16 მატჩში გატანილი 11 გოლით და უახლოეს მდევრებს 2 გოლით უსწრებს. ბუდუს აქტივში ასევე, 3 საგოლე პასია, ხოლო გერმანიის თასზე სამ შეხვედრაში თავი 2 გოლით და 3 საგოლე პასით გამოიჩინა. მოკლედ, შესანიშნავ სეზონს ატარებს.

„კარლსრუე“ 16 ტურის შემდეგ 26 ქულით მეოთხე ადგილზეა, თუმცა, სხვებს ამ ტურში ჯერ არ უთამაშიათ. კრისტიან აიხნერის გუნდი მომდევნო ტურში 21 დეკემბერს, სტუმრად „პადერბორნს“ დაუპირისპირდება.