საქართველოს ეროვნული ლიგის 2024 წლის სეზონი დასრულდა. ბოლო მატჩი „იბერიას“ და „სამგურალს“ შორის გაიმართა, რომელიც სატურნირო ცხრილში არაფერს წყვეტდა.

მატჩი ფრედ, 1:1 დასრულდა. ანგარიში ბენჟამინ ტეიდმა გახსნა, ხოლო ლუკა ხორხელმა მეორე ნახევარში გაათანაბრა. „იბერიამ“ 75 ქულით დაასრულა გამოსვლა და საქართველოს ჩემპიონი ისტორიაში მეორედ გახდა, ხოლო „სამგურალი“ 44 ქულით მეხუთე ადგილზე გავიდა.

ყველა ვერდიქტი: „იბერია“ ჩემპიონი და ჩემპიონთა ლიგის საკვალიფიკაციო ეტაპზე გამოვა. კონფერენს ლიგაზე ითამაშებენ „ტორპედო“, „დილა“ და „სპაერი“, რომელიც ეროვნულ ლიგა 2-ში მეხუთე ადგილზე გავიდა, მაგრამ საქართველოს თასი მოიგო.

ეროვნული ლიგიდან დაქვეითდა „სამტრედია“, ხოლო პლეი-აუტში „გაგრა“ „სიონს“ და „თელავი“ „რუსთავს“ დაუპირისპირდება. ამ წყვილებში ორმატჩიან დუელში გამარჯვებულები მომდევნო სეზონში ეროვნულ ლიგაში ითამაშებენ, დამარცხებულები ეროვნულ ლიგა 2-ში.

ეროვნული ლიგა 2-დან ეროვნულ ლიგაში აღზევდა „გარეჯი“, ხოლო ლიგა 3-ში გავარდნენ ხობის „კოლხეთი“ და „ვიტ ჯორჯია“. ეროვნულ ლიგა 2-ში დასარჩენად იბრძოლებენ პლეი-აუტში „შტურმი“ და „არაგვი“, რომლებიც შესაბამისად მარტვილის „მერანს“ და „იბერია 2“-ს შეხვდებიან. ლიგა 3-დან ეროვნულ ლიგა 2-ში აღზევდნენ „გონიო“ და ტყიბულის „მეშახტე“.

პლეი-აუტის მატჩები 12-16 დეკემბერს გაიმართება.

ლიგა 3-დან ლიგა 4-ში გავარდნენ „ზესტაფონი“, „მაჭახელა“ და ლანჩხუთის „გურია“, ხოლო ლიგა 4-დან ლიგა 3-ში აღზევდნენ „დიდუბე“, „მარგვეთი 2006“ და „ოდიში“, რეგიონულ ლიგაში „ვარკეთილი 2“, თბილისის „მერანი 2“ და „ჩიხურა“ დაქვეითდნენ.

„იბერია“ – „სამგურალი“ 1:1 (1:0)

გოლები: 1:0 ტეიდი (41), 1:1 ხორხელი (55)

პლეი-აუტი

12 დეკემბერი

„სიონი“ – „გაგრა“

„იბერია 2“ – „არაგვი“

„თელავი“ – „რუსთავი“

„შტურმი“ – „მერანი მარტვილი“

16 დეკემბერი

„არაგვი“ – „იბერია 2“

„მერანი მარტვილი“ – „შტურმი“

„გაგრა“ – „სიონი“

„რუსთავი“ – „თელავი“