იტალიის სერია A-ს მე-14 ტურში „ნაპოლიმ“ „ტორინო“ სკოტ მაკტომინეის გოლით დაამარცხა. შოტლანდიელს საგოლე პასი ხვიჩა კვარაცხელიამ გაუკეთა, რომელსაც იტალიური მედიისგან კარგი შეფასებები ერგო:

Tuttomercatoweb 7 ქულა: „მაკტომინეის გოლში ყველა საჩუქარი მისია. კიდევ ერთი საგოლე პასი, სეზონში მესამე, მე-14 მატჩში გოლში მერვე მონაწილეობა. შეიძლება ორი სეზონის წინანდელთან შედარებით ნაკლებად ბრწყინავს, მაგრამ „ნაპოლის“ გამარჯვებებში მისი წვლილი ყოველთვის არის“.

Calcionapoli1926 6.5 ქულა: „თამაში თავიდანვე სწორი მიდგომით დაიწყო, რამდენჯერმე იმოქმედა კარგად, ისევე, როგორც მაკტომინეის გოლის მომენტში. ამჯერადაც თანაგუნდელებისთვის ბევრ თავგანწირვაზე წავიდა. კონტემ მაშინ შეცვალა, როცა თამაშში აღარ ჩანდა“.

Calciomercato 6.5 ქულა: „მან დიდი სურვილი გამოავლინა, რომ განსხვავება მოეხდინა და მუდმივად მეტოქეს უმიზნებდა. პირველ ტაიმში ორ მეტოქეს ყვითელი ბარათი აკიდა, ასევე მაკტომინეის გაუკეთა პასი, რის შემდგომაც ანგარიში გაიხსნა“.

ხვიჩა კვარაცხელიას სერია A-ს მიმდინარე სეზონში ჩატარებულ 14 მატჩში 5 გოლი აქვს გატანილი, 3-ჯერ საგოლე პასი მიითვალა.

„ნაპოლი“ 32 ქულით ისევ პირველ ადგილზეა და ამ ტურსაც ლიდერის რანგში დაასრულებს, მომდევნო ტურში კი, 8 დეკემბერს, „ლაციოს“ უმასპინძლებს.