ავსტრიაში, Linz Open-ის ტურნირი წყვილთა თანრიგში აშშ-ის სახელით მოასპარეზე ქართველი ანა ტატიშვილისა და მისი მეწყვილე რუმინელი რალუკა ოლარუს გამარჯვებით დასრულდა.

ტატიშვილ-ოლარუს წყვილმა ფინალში გერმანელი ანიკა ბეკისა და ფრანგი კაროლინ გარსიას დუეტი დაამარცხა (6:2, 6:1). მატჩი 53 წუთს გრძელდებოდა.

ქართულ-რუმინულმა წყვილმა მეოთხედფინალში ტურნირის პირველ ნომრად განთესილი ბარბარა ზაჰლავოვა-სტრიკოვასა და ლუსი ჰრადეცკას ჩეხური წყვილი დაამარცხა (6:3, 4:6, 10:6), ხოლო ნახევარფინალში ტურნირის მე-4 ნომრად განთესილ დაბროვსკი-როსოლკას დუეტს მოუგეს (4:6, 7:6, 10:6).

Linz Open-ის საპრიზო ფონდი 220000 ამერიკულ დოლარს შეადგენს.

ანამ კარიერაში პირველი WTA-ის ტურნირი მოიგო. აქამდე ტატიშვილს მხოლოდ ITF-ის ტურნირები ჰქოდნა მოგებული. ერთეულთა თანრიგში 11 ტურნირი, ხოლო წყვილთა თანრიგში - 7.

ავსტრიული ტურნირი კიდევ ერთ ქართველ ჩოგბურთელს აქვს ორჯერ მოგებული. ლეილა მესხი წყვილთა თანრიგში რუს ევგენია მანიუკოვასთან ერთად 1993 და 1994 წლებში გახდა Linz Open-ის გამარჯვებული.