ესპანეთის ლა ლიგის მე-13 ტური სენსაციური გამოდგა, რადგან ლიდერი „ბარსელონა“ სტუმრად „რეალ სოსიედადთან“ მინიმალური სხვაობით დამარცხდა და 7-მატჩიანი მოგებათა სერია შეწყვიტა.

ჰანსი ფლიკის გუნდი მთელი თამაშის განმავლობაში უპირატესობას ფლობდა, თუმცა მაინც დამარცხდა. მასპინძელთა გუნდიდან 3-ქულის მომტანი ერთადერთი გოლი 33-ე წუთზე სურინამელმა ფორვარდმა შერალდო ბეკერმა გაიტანა - 1:0.

აღსანიშნავია ისიც, რომ მე-13 წუთზე კატალონიური გრანდიდან რობერტ ლევანდოვსკიმ გაიტანა, თუმცა მომენტის გადამოწმების შემდეგ თამაშგარე მდგომარეობის გამო გოლი არ ჩაითვალა. ამ მომენტს დიდი გამოხმაურება და პოლემიკა მოჰყვა.

„ბარსელონას“ 33 ქულა აქვს და ლიდერია. „ბლაუგრანა“ მადრიდის“ რეალს 6 ქულით უსწრებს, მაგრამ „სამეფო კლუბს“ თამაშით ნაკლები აქვს ჩატარებული. „სოსიედადმა“ კი 18 ქულა დააგროვა და მე-8 ადგილზე იმყოფება.