ვეტერანი ქართველი ფეხბურთელი და მწვრთნელი თემურ ქეცბაია „ნიუკასლში“ ვახტანგ სალიას ტრანსფერს გამოეხმაურა და ახალგაზრდა ფეხბურთელს წარმატებები უსურვა.

„აღფრთოვანებული ვარ, რომ ვახო სალია „ნიუკასლში“ გადავიდა. ეს ის კლუბია, სადაც კარიერის საუკეთესო პერიოდი გავატარე და იქ გატარებულ წლებს ვერაფერს შევადარებ. ვახოს ვუსურვებ უფრო წარმატებულ და ხანგრძლივ კარიერას ამ კლუბში, რომელსაც ძლიერი შემადგენლობა ჰყავს და პრემიერლიგის ერთ-ერთი წამყვანი კლუბია.

დარწმუნებული ვარ, ამ ტრანსფერის შემდეგ ის კიდევ უფრო მეტს იმუშავებს, რათა, რაც შეიძლება მალე მიაღწიოს მიზანს და ყველას დაუმტკიცოს, რომ მისი შეძენა სწორი არჩევანი იყო. ასეთი ტრანსფერები და ამ დონეზე თამაში გვჭირდება, რომ საქართველოს ნაკრების წარმატებული პერიოდი კიდევ უფრო გაგრძელდეს და გაძლიერდეს. წარმატებები ვახოს და საქართველოს“, - დაწერა ქეცბაიამ სოციალურ ქსელში.

შეგახსენებთ, რომ თემურ ქეცბაია „ნიუკასლში“ 1997-2000 წლებში თამაშობდა, ხოლო ვახტანგ სალიამ „კაჭკაჭებთან“ 5-წლიანი კონტრაქტი გააფორმა.