გიორგი მიქაუტაძემ „ლიონში“ უგოლო სერია დაასრულა. ქართველმა ფეხბურთელმა ლიგა 1-ის მეცხრე ტურში „ოსერთან“ ბრწყინვალედ ითამაშა და მიღებული შანსი გამოიყენა.
მიქაუტაძე ძირითად შემადგენლობაში მოხვდა და დუბლით გამოირჩა. მან პირველი ტაიმის მიწურულს პენალტი მოიპოვა, რომელიც ზუსტად თვითონვე შეასრულა და ანგარიში გახსნა.
62-ე წუთზე ჟორჟმა საიდ ბენრაჰმას შესანიშნავი პასი გამოიყენა და თავური დარტყმით მეორედ შეაგდო, „ლიონი“ ისევ დააწინაურა, იმ დროისთვის 2:1. ქართველი ფეხბურთელი 78-ე წუთზე შეცვალეს. „ლიონმა“ მიქაუტაძის დუბლის მიუხედავად, მაინც ვერ მოიგო, რადგან ასევე ორჯერ გაუშვა და ფრეს დასჯერდა (2:2).
„ოსერი“ მიმდინარე სეზონში ქართველებისთვის ბედნიერი კლუბია - სწორედ მის წინააღმდეგ სამი კვირის წინ ზურიკო დავითაშვილმა ჰეთ-თრიქი შეასრულა, ახლა მიქაუტაძე დუბლით გამოირჩა. გავიხსენოთ, რომ ლიგა 1-ის მეცხრე ტურში დუბლი დავითაშვილმაც შეასრულა („ანჟერთან“).
გიორგი მიქაუტაძეს „ლიონში“ ყველა ტურნირზე ჩატარებულ 11 მატჩში 2 გოლი აქვს გატანილი, ხოლო ერთხელ საგოლე პასით გამოირჩა.
„ლიონი“ ლიგა 1-ში 9 ტურის შემდეგ 14 ქულით მეშვიდე ადგილზეა, მომდევნო ტურში კი 1 ნოემბერს, „ლილს“ სტუმრად დაუპირისპირდება.
