ბუდუ ზივზივაძემ უგოლო სერია დაასრულა და გერმანიის II ბუნდესლიგის მეათე ტურში ბერლინის „ჰერტასთან“ გაიტანა.

ქართველმა ფეხბურთელმა პირველი ტაიმის კომპენსირებულ დროში თავური დარტყმით დალაშქრა მეტოქის კარი და იმ დროისთვის ანგარიში გაათანაბრა (1:1). თუმცა, მეორე ნახევარში „კარლსრუემ“ ორი უპასუხო გოლი გაუშვა და მიმდინარე სეზონში პირველი მარცხი განიცადა - 1:3.

ზივზივაძემ 13 სექტემბრის შემდეგ, როცა „შალკესთან“ დუბლი შეასრულა, პირველად გაიტანა. ეს მისი მეშვიდე გოლია II ბუნდესლიგაში ჩატარებულ მეათე შეხვედრაში და ბომბარდირთა დავას კიდევ ორ ფეხბურთელთან ერთად ლიდერობს. გარდა ამისა, ბუდუს აქტივში ორი საგოლე პასია, ხოლო ერთი გოლი გერმანიის თასზეც გაიტანა.

„კარლსრუე“ 19 ქულით მესამე ადგილზეა, მომდევნო ტურში კი, 2 ნოემბერს, „ჰანოვერს“ სტუმრად შეხვდება.