საქართველოს ჩემპიონმა „ქუთაისმა“ ფიბა ევროპის თასზე პირველი ტურის მატჩი სლოვაკურ „პრიევიძასთან“ ჩაატარა და მარცხი განიცადა.

კოტე ტუღუშის გუნდმა თამაში კარგად დაიწყო, 9-ქულიან უპირატესობასაც ფლობდა, ხოლო ტაიმი 3 ქულით მოიგო. თუმცა, მეორე ნახევარში სლოვაკებმა მოიპოვეს უპირატესობა და საბოლოოდ გაიმარჯვეს კიდეც - 77:69.

„ქუთაისს“ გიორგი კორსანტიამ ულიდერა, რომელმაც 24 ქულა და 11 მოხსნა მიითვალა, ხოლო აკაკი დვალიშვილის აქტივში 18 ქულა და 5 მოხსნა იყო.

„ქუთაისი“ ფიბა ევროპის თასის მეორე ტურში 16 ოქტომბერს, „ბილბაოს“ უმასპინძლებს. ტუღუშის გუნდმა მიმდინარე სეზონი ჩემპიონთა ლიგის საკვალიფიკაციო ეტაპზე დაიწყო, სადაც პირველივე შეხვედრა წააგო და ევროპის თასზე გადაერთო.