გერმანიის II ბუნდესლიგის მერვე ტურში ბუდუ ზივზივაძის „კარლსრუემ“ „დარმშტადს“ უმასპინძლა, რომელსაც დაუზავდა - 3:3.
მატჩი ძალიან დაძაბული და დრამატული გამოდგა. „კარლსრუე“ ორჯერ იგებდა, შემდეგ აგებდა, მაგრამ ბოლოს გაათანაბრა და ქულა გადაარჩინა. ბუდუ ზივზივაძე მოედანზე 79-ე წუთამდე იყო. ქართველს პირველ ტაიმში შეეძლო გატანა, მაგრამ ვერ მოახერხა და ამჯერად მოედანი უგოლოდ დატოვა.
ბუდუ ზივზივაძეს II ბუნდესლიგის მიმდინარე სეზონში 6 გოლი აქვს გატანილი (2 საგოლე პასიც) და ბომბარდირთა დავაში ლიდერობას ორ ფეხბურთელთან ერთად იყოფს. ქართველი ფორვარდი ახლა საქართველოს ნაკრებს შეუერთდება.
„კარლსრუე“ 8 ტურის შემდეგ დაუმარცხებელია (4 მოგება, 4 ფრე), მაგრამ ზედიზედ მესამედ ითამაშა ფრე და 16 ქულით მესამე ადგილზეა, ხოლო მომდევნო ტურში 20 ოქტომბერს, „ულმს“ ესტუმრება.
