იტალიაში საკალათბურთო სეზონი დაიწყო. სუპერთასის ნახევარფინალში „ვირტუს ბოლონიამ“ „ნაპოლი“ 96:87 დაამარცხა, თორნიკე შენგელიამ კი შესანიშნავი თამაში ჩაატარა.

ქართველმა კალათბურთელმა 29 წუთში 21 ქულა, 5 მოხსნა, 5 პასი და 1 ჩაჭრა მიითვალა, რითაც თანაგუნდელთა შორის საუკეთესო იყო. შენგელიამ 7-დან 6 ორქულიანი, 2-დან 1 სამქულიანი და 8-დან 6 საჯარიმო ჩააგდო.

თორნიკეს მარგი ქმედების კოეფიციენტი 31 გამოდგა, რითაც მატჩის MVP გახდა.

იტალიის სუპერთასის ფინალში „ვირტუსი“ 22 სექტემბერს, „ოლიმპია მილანოს“ დაუპირისპირდება.