‘შავმა ლომმა’ წლევანდელი რაგბი ევროპის სუპერ თასის პირველ მატჩში ესპანური ‘იბერიანსი’ რეკორდული სხვაობით, 54:3 დაამარცხა.

ეს იყო ამ გუნდების მეხუთე დაპირისპირება. აქამდე ოთხივე შეხვედრა თბილისში, „ავჭალაზე“ გაიმართა და ბოლო თამაში 41:0 დასრულდა, ესპანეთში, კერძოდ ბურგოსში გამართულ პირველ მატჩში კი ახალი რეკორდი დამყარდა.

აღსანიშნავია, რომ „სან ამარო სთედიუმის“ ტრიბუნებზე მრავლად იყვნენ ქართველი გულშემატკივრები და მათ მოლოდინი არც ‘შავმა ლომმა’ გაუცრუა – 8 გატანილი ლელო და არცერთი მიღებული ის შედეგია, რასაც ნებისმიერი ქომაგი ინატრებდა. მონაგარს 7 ზუსტი გარდასახვით 14 ქულა შემატა ლუკა მატკავამ, რომელსაც მხოლოდ ერთი დარტყმა გაუცუდდა.

დებიუტანტები

აღსანიშნავია, რომ წლევანდელ სეზონს ‘შავი ლომი’ მნიშვნელოვნად გადახალისებული შემადგენლობით შეხვდა. გუნდის მთავარი მწვრთნელის პოსტზე ოფიციალური ‘იბერიანსთან’ ოფიციალური დებიუტი ჰქონდა რიჩარდ კოკერილს. მისმა გაწვრთნილმა გუნდმა სანახაობრივი რაგბი ითამაშა და რამდენიმე ლამაზი ლელო გაიტანა.

გარდა ამისა შემადგენლობაში იყო 9 დებიუტანტი. ამირან შვანგირაძემ, გიორგი ცუცქირიძემ (2 ლელო) და დავით ხუროშვილმა დებიუტი ლელოებით აღნიშნეს. მართალია ქულები არ აუღიათ, მაგრამ კარგი თამაში ჩაატარეს სხვა დებიუტანტებმაც. ტრავმიდან დაბრუნება ლელოთი აღნიშნა კვაჭმა შალვა მამუკაშვილმაც. აღებული ქულებით თავი გამოიჩინეს დავით აბდუშელიშვილმა, თორნიკე კახოიძემ და დემე თაფლაძემ.

სრული დომინაციით

ბურგოსის ხელოვნურსაფარიან მოედანზე ‘შავი ლომი’ თავიდანვე დაეუფლა ინიციატივას და ის მატჩის ბოლომდე ხელიდან აღარ გაუშვია. ქართველები მასპინძლებს ყველა კომპონენტში ჯაბნიდნენ და რომ არა ტექნიკური წუნი, რაც სეზონის სადებიუტო თამაშით იყო გამოწვეული, სხვაობა კიდევ უფრო დიდი იქნებიდა.

ანგარიში მე-4 წუთზე გაიხსნა. მეტოქის 22-ში ფორვარდების რამდენიმე დარტყმის შემდეგ, ბურთი ხაზზე გავიდა, ის მარჯვენა ფრთაზე ამირან შვანგირაძემდე ჩათამაშდა, რომელმაც მბოჭავი კონტაქტით ჩამოიშორა და სადებიუტო ლელო გაიტანა. ‘იბერიანსმა’ 3 ქულა მე-8 წუთზე, 40 მეტრიდან გატანილი ჯარიმით აიღო, რის შემდეგაც მონაგარის გაზრდის შანსი პრაქტიკულად აღარ ქონია.

სტუმრებმა თამაში ეტაპობრივად დაალაგეს, მე-16 წუთზე მოლი ააგორეს, რომელიც ზედ ლელოს ხაზთან შეგვიჩერეს, თუმცა საქმეში დავით აბდუშელიშვილი ჩაერთო და მისი ძალისმიერი ლელო მატკავამ გარდასახა. 31-ე წუთზე გიორგი სინაურიძემ შეუტია კარგად, იერიში ლუკა ცირეკიძემ გააგრძელა, მეტოქის 22-ში ბურთი მარცხენა ფრთაზე ჩათამაშდა, სადაც მას გიორგი ცუცქირიძე დაეუფლა და ‘შავი ლომის’ კვართით თავისი პირველი ლელო გაიტანა. მატკავა რთული პოზიციიდან ზუსტი იყო.

ტაიმის ბოლოს კარგი ხელდახელ შეტევა წამოვიწყეთ და ‘იბერიანსმა’ ის ჯარიმის ხარჯზე შეაჩერა, მაგრამ ლელოს ვერ გადაურჩა – დერეფნიდან აგორებული მოლი შალვა მამუკაშვილის 5 ქულით დასრულდა. მატკავას ეს გარდასახვა გაუცუდდა და ტაიმი 26:3 დასრულდა.

4 ლელო მეორე ტაიმშიც

თამაშის განახლების შემდეგ ‘შავ ლომს’ თამაშის დასალაგებლად გარკვეული დრო დაჭირდა. შეცვლაზე შესული მორაგბეები მალე შეთამაშდნენ და დასკვნით 22 წუთში კიდევ 4 ლელო გაიტანეს.

განსაკუთრებით სანახაობრივი აღმოჩნდა ჩვენი გუნდის მე-5 ლელო. ‘იბერიანსმა’ მოლით სცადა ლელოს გატანა, სტუმრები ამას მომზადებული დაუხვდნენ, ირაკლი ქვათაძემ ბურთი წესების დაცვით მოიპარა და კონტრშეტევა წამოიწყო, ხელდახელ ბურთაობით გუნდმა თავისი 22-იდან მეტოქის 22-მდე იარა, იქ კი მატკავამ ფეხით მოზომილად გადაკიდა და მას ლელოში თორნიკე კახოიძე შეყვა. ეს იყო 100-მეტრიანი ლელო, რომელიც ნებისმიერ თამაშს დაამშვენებდა.

შეხვედრა თითქოს დაწყნარდა, მაგრამ დასკვნით წუთებში ‘შავმა ლომმა’ ისევ იფეთქა. 74-ე წუთზე დავით ხუროშვილმა კონტრშეტევა წამოიწყო, მარცხენა ფრთაზე ბურთი დემე თაფლაძესთან გაითამაშა და სადებიუტო ლელო გაიტანა. ბოლოსწინა წუთზე ლელო თავად თაფლაძემაც გაიტანა, გაწითლებულ დროზე კი ცუცქირიძემ რაქიდან გამოვარდნილი ბურთი აიტაცა და ლელომდე 55 მეტრი ირბინა. მატკავამ მეორე ტაიმში ყველა პოზიციიდან უშეცდომოდ ურტყა – 54:3.

‘შავი ლომი’ სუპერ თასის ზედიზედ მეოთხე ტიტულის დაცვას ერთი კვირის თავზე პორტუგალიაში გააგრძელებს. 21 სექტემბერს ის ლისაბონში ‘ლუზიტანუშს’ ერკინება, რომელმაც პირველ ტურში ‘იბერიანსს’ 36:18 სძლია.

რაგბი ევროპის სუპერ თასი 2024

A ჯგუფი. II ტური

15 სექტემბერი. კვირა.

ბურგოსი. სან ამარო სთედიუმი

იბერიანსი (ესპანეთი) – შავი ლომი (საქართველო) 3:54 (3:26)

შავი ლომი

ხაზი: 15. ლუკა ცირეკიძე, 14. ამირან შვანგირაძე, 13. დემურ თაფლაძე, 12. თორნიკე კახოიძე, 11. შალვა აფციაური, 10. ლუკა მატკავა, 9. თენგიზ პერანიძე;

შერკინება: 1. დათო აბდუშელიშვილი, 2. შალვა მამუკაშვილი, 3. ბაჩუკი ჭუმბაძე, 4. დემურ ეფრემიძე, 5. ვლადიმერ ჩაჩანიძე, 6. გიორგი სინაურიძე, 7. გიორგი ცუცქირიძე, 8. ლუკა ივანიშვილი (კაპ.).

მარქაფა: 16. ირაკლი ქვათაძე, 17. ვასილ კაკოვინი, 18. ნიკოლოზ ხატიაშვილი, 19. გუგა ღანიაშვილი, 20. გიორგი ნიკოლაძე; 21. დავით ხუროშვილი, 22. იოანე მეტრეველი, 23. ალექსანდრე თოდუა.

8 ლელო: შვანგირაძე, აბდუშელიშვილი, ცუცქირიძე (3, 8), მამუკაშვილი, კახოიძე, ხუროშვილი, თაფლაძე

7 გარდასახვა: მატკავა

III ტური. ლისაბონი

ლუზიტანუში (პორტუგალია) – შავი ლომი (საქართველო) (21:00 საქ. დრო)

RUGBY.GE