ინგლისის პრემიერლიგის მესამე ტური ლონდონის „არსენალის“ და „ბრაიტონის“ მატჩით გაიხსნა, რომელშიც გუნდებმა ქულები გაიყვეს.

„არსენალი“ უპირატესობას ფლობდა და პირველი ტაიმის მიწურულს კაი ჰავერცმა დააწინაურა. თუმცა, 49-ე წუთზე სიტუაცია შეიცვალა: საკმაოდ საკამათო სიტუაციაში დეკლან რაისი გააძევეს, რიცხობრივ უმცირესობაში კი, მიკელ არტეტას გუნდს გაუჭირდა.

58-ე წუთზე ჟოაო პედრომ მოახერხა ანგარიშის გათანაბრება, ხოლო დარჩენილ დროში არაფერი შეცვლილა. აღსანიშნავია, რომ ორივე გუნდმა მიმდინარე სეზონში ქულები პირველად დაკარგა.

„არსენალს“ და „ბრაიტონს“ სამი ტურის შემდეგ 7-7 ქულა აქვთ, ლონდონელები მომდევნო ტურში „ტოტენჰემს“ ესტუმრება, ხოლო „თოლიები“ „იფსვიჩს“ უმასპინძლებენ.