ტურინის „იუვენტუსს“ „მანჩესტერ იუნაიტედიდან“ ჯეიდონ სანჩოს დამატება სურს. ინფორმაციას იტალიური მედია ავრცელებს.

ჯერჯერობით, მხარეებს შორის შეთანხმება მიღწეული არაა, მაგრამ მუშაობა მიმდინარეობს და ოპტიმისტური განწყობაც აქვთ. „იუვენტუსს“ სანჩოს დამატება იჯარით და გამოსყიდვის უფლებით სურს, თავის მხრივ, ინგლისელთა სურვილი გამოსყიდვის ვალდებულებაა. გარდა ამისა, ხელფასის ნახევარი იჯარის პერიოდში ფეხბურთელს „მანჩესტერმა“ უნდა გადაუხადოს.

ჯეიდონ სანჩო ერიკ ტენ ჰაგის გეგმებში არ შედის და კლუბის დატოვება სურს, ის თანახმაა კარიერა იტალიურ გრანდში გააგრძელოს.

სანჩო „მანჩესტერმა“ „დორტმუნდიდან“ 2021 წელს შეიძინა და 83 მატჩში 12 გოლი გაიტანა, თუმცა, მან „ოლდ ტრაფორდზე“ მოლოდინი ვერ გაამართლა. გაცილებით კარგი იყო მანამდე „დორტმუნდში“, სადაც 158 შეხვედრაში 53 გოლი მიითვალა.

აქვე გეტყვით, რომ „იუვენტუსმა“ ცოტა ხნის წინ ნიკო გონსალესი და ფრანსისკო კონსეისაო დაიმატა, ხოლო დღეს, ტურინში სამედიცინო შემოწმებაზე ტეუნ კოპმაინერსი ჩავიდა, შესაბამისად, ისიც სულ მალე უნდა გახდეს „იუვეს“ ფეხბურთელი.