ირლანდიის ფეხბურთელთა ეროვნული ნაკრების მთავარმა მწვრთნელმა მარტინ ონილმა ევროშესარჩევის მეორე ტურში გიბრალტართან (7:0) მოგებული მატჩის შემდეგ განაცხადა, რომ მომდევნო მატჩში მის გუნდს გერმანიისთვის პრობლემების შექმნა შეუძლია.

"გიბრალტართან მატჩის სტარტი მშვენიერი გამოგვივიდა. კინიმ 12 წუთში ჰეთრიკი შეასრულა. იმედგაცრუებული მხოლოდ ბოლო 20 წუთი ვიყავი, როცა ორივე გუნდი მოეშვა და სერიოზული არაფერი მომხდარა.

თამაშის მიმდინარეობისას ბევრი გადაადგილება იყო და ჩემმა ფეხბურთელებმა, რომლებიც თავიანთ კლუბებში კარგად ასპარეზობენ, მითითებები ზუსტად შეასრულეს.

გერმანიაში 6 ქულით მივდივართ და ეს ფაქტი მახარებს. მომდევნო მატჩში, ვფიქრობ, მეტოქისთვის პრობლემების შექმნა შეგვიძლია" - განაცხადა ჩრდილოირლანდიელმა სპეციალისტმა.

ევროშესარჩევი ეტაპის მესამე ტურის მატჩი გერმანიას და ირლანდიას შორის გელზერკირხენში "ველტინს არენაზე" გაიმართება. შეხვედრა თბილისის დროით 22:45 საათზე დაიწყება.