საქართველოს ნაკრების ფეხბურთელმა გიორგი მიქაუტაძემ ესპანეთთან მატჩის (1:4) შემდეგ კომენტარი გააკეთა. როგორც მან თქვა, ამაყობენ იმ შედეგით, რაც ევრო 2024-ზე აჩვენეს. 23 წლის ქართველმა თავის მომავალზეც ისაუბრა:

„ესპანეთს მაღალი დონის ფეხბურთელები ჰყავს, ჩვენზე ძლიერები არიან. ეჭვგარეშეა, რომ ამ ევროპის ჩემპიონატზე საუკეთესო გუნდია. პირველ ტაიმში მოვახერხეთ მათი შეჩერება, მაგრამ მეორე ნახევარში ეს ვეღარ გავაკეთეთ. ევრო 2024-ს თავაწეულები ვტოვებთ, ვამაყობთ იმით, რაც გავაკეთეთ.

ჩემი მომავალი? ბედნიერი ვარ, ჩემი უნარები წარმოვაჩინე. ახლა შვებულებაში მივდივარ და ვნახოთ, რა მოხდება. გადაწყვეტილება ჯერ არ მიმიღია“, - უთხრა ჟორჟმა ფრანგულ მედიას.

გიორგი მიქაუტაძე „მეცმა“ „აიაქსიდან“ 13 მილიონ ევროდ გამოისყიდა, მაგრამ ის ამ კლუბში არ დარჩება. ინტერესი დიდია - „მარსელი“, „ლიონი“, „ლანსი“, „ვესტ ჰემი“ და „მონაკო“. როგორც ფაბრიციო რომანო იტყობინება „მონაკოსთან“ შეთანხმებაც მიღწეულია, თუმცა ბრიტანულ მედიაში „ვესტ ჰემის“ შესახებაც ხშირად წერენ. გიორგის სატრანსფერო ღირებულება დაახლოებით 20 მილიონი ევროა.