უნგრეთის ქალაქ სეგედში მიმდინარე კაიაკისა და კანოეს ევროპის ჩემპიონატზე საქართველოს კიდევ ერთი მედალი ბადრი ყაველაშვილმა მოუტანა.

ქართველმა ნიჩბოსანმა ერთადგილიანი კაიაკით 200-მეტრიანი დისტანცია 35,441 წამში დაფარა, ასპარეზობა მესამე ადგილზე დაასრულა და ბრინჯაოს მედალს დაეუფლა.

ევროპის ჩემპიონი - უკრაინელი სპორტსმენი, ვიცე-ჩემპიონი კი პოლონელი ნიჩბოსანი გახდა.

შეგახსენებთ, რომ ევროპის ჩემპიონატზე ერთადგილიანი კანოეთი ასპარეზობისას ბრინჯაოს მედალი მოიპოვა ზაზა ნადირაძემ, რომელმაც 200-მეტრიანი დისტანცია 38,898 წამში დაფარა.