ლაშა ფირცხალაიშვილის გაწვრთნილმა საქართველოს 19-წლამდე ვაჟთა ნაკრებმა, დღეს, 8 ივნისს, თბილისში, დავით პეტრიაშვილის სახელობის სტადიონზე ჩრდილომაკედონიელ თანატოლებს ამხანაგურად უმასპინძლა და უგოლოდ დაშორდა - 0:0.

ქართველი ჭაბუკები ტერიტორიულ უპირატესობას ფლობდნენ, მაგრამ გოლის გატანა ვერ შეძლეს. სტუმრები 78-ე წუთიდან კაცნაკლულნი დარჩნენ, მათ შეცვლაზე შესული დარკო სეკოვსი გაუძევეს.

ჩრდილეთ მაკედონელებს ჩვენებურები 10 ივნისს კიდევ შეხვდებიან. ამჯერადაც ამხანაგურად.

შეგახსენებთ, რომ 13-დან, 19 ნოემბრის ჩათვლით, ქართველი 19-წლამდელები შვედეთში გასამართ ევროპის ჩემპიონატის საკვალიფიკაციო რაუნდში მიიღებენ მონაწილეობას. ჯგუფში ჩვენი ნაკრები ნორვეგიას, ესტონეთს და ჯგუფის მასპინძელ შვედეთს დაუპირისპირდება.

ჩერდილომაკედონიელთა წინააღმდეგ ჩვენებურებმა ასეთი შემადგენლობით ითამაშეს: საური, ნიკოლაიშვილი, ხარებაშვილი (მაშავა 74), შაშიაშვილი (მეხტიევი 83), ტყეშელაშვილი, გოგსაძე (გვასალია 83), გეგუჩაძე (ბუბუტეიშვილი 59), ფეიქრიშვილი, ბერელიძე (დოლტმურზიევი 74), სამუშია, ოდიკაძე (ჩიქოვანი 59).