მონტენეგროს ნაკრების ფეხბურთელმა მარკო ვეშოვიჩმა საქართველოს ნაკრებთან ამხანაგურ მატჩამდე ისაუბრა. როგორც მან თქვა, მოტივირებული არიან, რომ თავიანთი შესაძლებლობები დაამტკიცონ ნაკრების წინააღმდეგ, რომელიც ევროპის ჩემპიონატზე ითამაშებს.

„ჩვენ გვაქვს მიზეზი, რომ ვიბრძოლოთ და ვაჩვენოთ, რომ შეგვიძლია ვითამაშოთ იმ ნაკრებებთანაც, რომლებიც ევროპის ჩემპიონატზე ითამაშებენ. დარწმუნებული ვარ, ვინც ითამაშებს, მაქსიმუმს გაიღებს, თუმცა რთული თამაში იქნება“, - თქვა ვეშოვიჩმა.

მატჩამდე კომენტარი გააკეთა მონტენეგროელმა ნახევარმცველმა მარკო ბაკიჩმა:

„საქართველოს ნაკრებს სურს თავისი პოტენციალი ევროპის ჩემპიონატამდეც გამოავლინოს, ყველაფერი უნდა გავაკეთოთ მათ წინააღმდეგ სათამაშოდ, ხარისხიანი გუნდია და ბოლომდე დახარჯვა დაგვჭირდება“, - თქვა ბაკიჩმა.

მონტენეგროს და საქართველოს ნაკრებთა მატჩი 9 ივნისს, თბილისის დროით 22:45 საათზე გაიმართება.

შეგახსენებთ, საქართველოს ნაკრები ევრო 2024-ის ჯგუფურ ეტაპზე 18 ივნისს, დორტმუნდში, თურქეთის ნაკრებს, 22 ივნისს, ჰამბურგში, ჩეხეთის ნაკრებს და 26 ივნისს, გელზენკირხენში, პორტუგალიის ნაკრებს შეხვდება.