მაურისიო პოჩეტინო „ჩელსის“ მწვრთნელი აღარ არის. ინფორმაცია ინგლისურმა კლუბმა ოფიციალურად დაადასტურა.

განცხადებაში ნათქვამია, რომ მხარეები თანამშრომლობის გაწყვეტაზე შეთანხმდნენ. „ჩელსიმ“ არგენტინელ სპეციალისტს გაწეული სამსახურისთვის მადლობა გადაუხადა და მომავალ კარიერაში წარმატებები უსურვა.

„მადლობა „ჩელსის“ ხელმძღვანელობას შანსის მოცემისთვის. კლუბს ყველაფერი აქვს, რათა პრემიერლიგასა და ევროპაში წარმატებას მიაღწიოს მომდევნო წლების განმავლობაში“, - აღნიშნა პოჩეტინომ, რომელთანაც ერთად კლუბი მისი სტაფის წევრებმაც დატოვეს.

მაურისიო პოჩეტინომ „ჩელსი“ 2023 წლის ზაფხულში ჩაიბარა, მისი ხელმძღვანელობით ლონდონური კლუბი პრემიერლიგაში მეექვსე ადგილზე გავიდა.

ჯერჯერობით, უცნობია, ვინ შეცვლის მას, მაგრამ დაასახელეს კირან მაკენას, ოლივერ გლაზნერის და ენცო მარესკას ვარიანტები.