ფეხბურთი

1:05 | 13.05.2024 | ნანახია [] - ჯერ

გიორგი მიქაუტაძემ ზედიზედ მე-6 მატჩში გაიტანა, "მეცმა" ისევ ბოლო წუთებში წააგო (+VIDEO)

საფრანგეთის ლიგა 1-ის 33-ე ტურში „მეცი“ სტუმრად „სტრასბურს“ დაუპირისპირდა და ახალი არაფერი მომხდარა - გიორგი მიქაუტაძემ ისევ გაიტანა, „მეცმა“ კი, ბოლო წუთებში ლამის მოგებული თამაში წააგო.

დიახ, ლაშლო ბოლონის გუნდმა უამრავი ქულა დაკარგა ბოლოს გაშვებული გოლებით. მიქაუტაძემ დიდებულად ითამაშა - უკვე ტრადიციულად.

მან ზედიზედ მეექვსე შეხვედრაში გაიტანა (მე-8 გოლი) და მოედანს უგოლოდ აღარ ტოვებს. გიორგიმ ანგარიში 54-ე წუთზე ძალიან ეფექტური დარტყმით გახსნა. 77-ე წუთზე დუბლთან და ულამაზეს გოლთან იყო ძალიან ახლოს, მაგრამ ბურთი ძელს მოხვდა და „სტრასბური“ გადარჩა.

მერე მოხდა ის, რაც მიმდინარე სეზონში უამრავჯერ მომხდარა: 89-ე და 92-ე წუთებზე „მეცმა“ ორი გოლი გაუშვა და შინ უქულოდ დაბრუნება მოუწია - 1:2.

გიორგი მიქაუტაძეს 19 შეხვედრაში 13 გოლი აქვს გატანილი, 4-ჯერ საგოლე პასი მიითვალა. ის მარტო ცდილობს „მეცის“ გადარჩენას, მაგრამ მისი თანაგუნდელები ყველაფერს აკეთებენ გასავარდნად... წარმოუდგენელია ის შეცდომები, რომელსაც ამ გუნდის მცველები უშვებენ.

მიქაუტაძემ რეკორდიც დაამყარა: ის საფრანგეთის ლიგა 1-ის ისტორიაში ყველაზე მეტი გოლი გამტანი ფეხბურთელი გახდა იმ ფეხბურთელებში, რომლებიც ლიგა 1-ში იანვრის სატრანსფერო ფანჯრის დროს გამოჩნდნენ. „მეცში“ დაბრუნების შემდეგ 23 წლის ქართველის აქტივში 11 გოლია, რაც იანვარში შეძენილ ფეხბურთელებში საუკეთესო შედეგია.

„მეცი“ 29 ქულით მე-16 ადგილზეა და 3 ქულით უსწრებს გასავარდნ ზონაში მყოფ „ლორიანს“, რომელსაც ბურთების ბალანსითაც სჯაბნის. თუმცა, ბოლონის გუნდისთვის ბოლო ტური მაინც პრობლემურია, რადგან „მეცი“ „პარი სენ-ჟერმენს“ ხვდება და დიდი შანსი ცხადია, რომ არ ექნება, ხოლო „ლორიანი“ ბოლოადგილოსან და გავარდნილ „კლერმონს“ უმასპინძლებს, რომლის დამარცხება წესით არ გაუჭირდება.

ნებისმიერ შემთხვევაში, „მეცს“ მე-16 ადგილზე გასვლის შემთხვევაშიც არ ექნება არაფერი გარანტირებული, რადგან ამ შემთხვევაში პლეი-ოფში ლიგა 2-ის მესამეადგილოსანთან მოუწევს დაპირისპირება. ლიგა 1-ში ბოლო ტური 19 მაისს გაიმართება.

სარეკლამო ადგილი - 23
250 x 500
0.112032