ინგლისის პრემიერლიგის 37-ე ტურში ლონდონის „არსენალმა“ სტუმრად „მანჩესტერ იუნაიტედი“ დაამარცხა და ჩემპიონობის შანსი შეინარჩუნა.

მიკელ არტეტას გუნდს „ოლდ ტრაფორდზე“ მოსაგებად ლეანდრო ტროსარის ერთადერთი გოლი ეყო, რომელმაც თავი მეოცე წუთზე გამოიჩინა. დარჩენილ დროში „მეთოფეებმა“ უპირატესობა შეინარჩუნეს და უმნიშვნელოვანესი თამაში მოიგეს.

„არსენალი“ 86 ქულით ლიდერია და სეზონს 19 მაისს, „ევერტონთან“ საშინაო მატჩით დაასრულებს. თუმცა „სიტის“ მხოლოდ ერთი ქულით უსწრებს, პეპ გვარდიოლას გუნდს კი, სეზონის ბოლომდე ორი მატჩი აქვს გასამართი.

„მანჩესტერ იუნაიტედი“ 54 ქულით მერვე ადგილზეა და დიდი შანსია ევროტურნირებზე საერთოდ ვერ გავიდეს.