გაიხსნა საკვალიფიკაციო სერია 2024-2025 წლების სეზონის სუპერლიგის ერთი საგზურისთვის, რომელშიც ზესტაფონის მარგვეთი და “სოხუმი-საქართველო” მონაწილეობენ. იმერულმა კლუბმა მიმდინარე სუპერლიგის რეგულარულ ჩემპიონატში ბოლოსწინა, მე-10 ადგილი დაიკავა და უმაღლესში ადგილის შენარჩუნება “ა” ლიგის ფინალში დამარცხებულ სოხუმელებთან უწევს. სოხუმი-საქართველოსთვის ესაა შანსი, სუპერლიგის საგზური მოიპოვოს, რაც წინა სეზონში გორის ივერიონმა “ტიტების” ძლევით მოახერხა და სუპერლიგაში აღზევდა.

წლევანდელ საკვალიფიკაციოში სუპერლიგის გუნდი დაწინაურდა, რომელმაც დღეს, ზესტაფონში მეტოქე 93:81 (სტატისტიკა) დაამარცხა. მხოლოდ ბოლო პერიოდი დასრულდა ფრედ, დანარჩენი კი მარგვეთმა მოიგო, რომელიც ფარქვეშ დაიჩაგრა (სოხუმი-საქართველომ 17-ით მეტი ბურთი მოხსნა), მაგრამ უფრო მთავარ კომპონენტში, შორ და საშუალო სროლებში იძალა და გამარჯვებასაც მიაღწია.

მაიკლ მეოსმა 7 სამქულიანი ჩააგდო, რომელმაც შეხვედრა 32 ქულით დაასრულა. 20 ქულა და 12 პასი ჰქონდა ზესტაფონელთა მეორე უკანახაზელ მალიქ ჯეიკობს, ლუკა ზაქრაძემ 12 ულა დააგროვა. სოხუმი-საქართველოში 17 ქულით, 7 მოხსნითა და 6 პასით საუკეთესო იყო ვასილ ბერუაშვილი. 14 ქულა და 12 მოხსნა მამუკა ბაზუაშვილის ანგარიშზე დაგროვდა.

სერია სამ მოგებამდეა, მეორე შეხვედრა კი 22 აპრილს კვლავ ზესტაფონში გაიმართება.

GBF.GE