კონფერენს ლიგაზე ორი მეოთხედფინალური მატჩი გაიმართა და ორივეში 90 წუთი საკმარისი არ გამოდგა.

ფლორენციის „ფიორენტინა“ უდიდეს უპირატესობას ფლობდა ჩეხურ „პლზენთან“, რასაც ისიც დაემატა, რომ 66-ე წუთიდან ჩეხები რიცხობრივ უმცირესობაში იყვნენ. მიუხედავად ამისა, მატჩის ძირითადი დრო 0:0 დასრულდა, ვინაიდან ზუსტად ეს ანგარიში დაფიქსირდა პირველ მატჩშიც, დამატებითი დრო დაინიშნა.

იქ უკვე „პლზენმა“ ვეღარ გაძლო. 92-ე წუთზე ნიკო გონსალესმა გაიტანა, ხოლო 108-ე წუთზე კრისტიანო ბირაგიმ და ფლორენციელები ნახევარფინალში გავიდნენ. მოგეხსენებათ, „ფიორენტინა“ შარშან კონფერენს ლიგაზე ფინალამდე მივიდა, სადაც „ვესტ ჰემთან“ წააგო.

ნახევარფინალში ითამაშებს ბირმინგემის „ასტონ ვილაც“, რომელმაც „ლილი“ დაძაბულ ბრძოლაში დაამარცხა.

„ლილს“ ბირმინგემში 1:2 ჰქონდა წაგებული და „პიერ მოროზე“ აქტიურად დაიწყო თამაში. მე-15 წუთზე იუსუფ იაზიჯიმ გახსნა ანგარიში და ფრანგებმა ტაიმი მოიგეს. 68-ე წუთზე ბენჟამინ ანდრემ გაიტანა და სხვაობა ორამდე გაზარდა.

„ლილი“ ძალიან ახლოს იყო ნახევარფინალთან, მაგრამ 87-ე წუთზე მეტიუ კეშმა გაიტანა და თამაში დამატებით დროში გადაიყვანა, რადგან ორივე მატჩი მასპინძლებმა იდენტურად 2:1 მოიგეს. დამატებით ნახევარ საათში არაფერი შეცვლილა, პენალტების სერიაში კი ინგლისურმა კლუბმა 4:3 მოიგო. „ლილმა“ 5-დან 3 პენალტი გაიტანა, „ასტონ ვილამ“ 5-დან 4 და ნახევარფინალშია. ბირმინგემელთა მხრიდან დიბუ მარტინესი იყო გმირი, რომელმაც ორი პენალტი მოიგერია.