„ალ ჰილალი“ საოცარ ფორმაშია და ყველა ტურნირის ჩათვლით ზედიზედ 28 თამაში მოიგო, რაც მსოფლიო რეკორდია.

ჟორჟე ჟეზუშის გუნდმა ამ ნიშნულს „ალ იტიჰადთან“ მოგების (2:0) შემდეგ მიაღწია. არაბული კლუბი აქამდე უელსურ „ნიუ საინტსთან“ იყოფდა რეკორდს (ზედიზედ 27 მოგება), მანამდე ორივე გუნდმა „აიაქსის“ შედეგი გააუმჯობესა, როცა ამსტერდამელებმა 1971-1972 წლებში მიჯრით 26 თამაში მოიგეს.

თუმცა, ახლა „ალ ჰილალი“ ზედიზედ 28 მოგებით რეკორდის ერთპიროვნული მფლობელი გახდა და გინესის რეკორდების წიგნშიც შევიდა.

„ალ ჰილალმა“ ბოლოს გასული წლის 21 სექტემბერს ვერ მოიგო, როცა „დამაკს“ დაუზავდა (1:1).