„მეცის“ თავდამსხმელმა გიორგი მიქაუტაძემ „კლერმონთან“ მატჩის (1:0) შემდეგ კომენტარი გააკეთა. როგორც მან თქვა, წინ ყველაზე რთული და გადამწყვეტი ბრძოლებია.

„ნანტთან“ მატჩის შემდეგ გვინდოდა კიდევ ერთი თამაშის მოგება, ამიტომ ყველა ბედნიერები ვართ, მაგრამ ვიცით, რომ აქ სეზონი არ მთავრდება, მძიმე მატჩები გველოდება. თუ აქ დავბრუნდი, ნიშნავს, რომ ყველაფერი უნდა გავაკეთო, რათა „მეცი“ ლიგა 1-ში დავტოვო“, - აღნიშნა მიქაუტაძემ.

შეგახსენებთ, რომ გიორგი მიქაუტაძემ ლიგა 1-ის მიმდინარე სეზონში მეხუთე გოლი გაიტანა და გარდა ამისა, 3 საგოლე პასიც აქვს (11 შეხვედრაში). ის გუნდის საუკეთესო ბომბარდირია მიუხედავად იმისა, 6 თვე სხვა გუნდში თამაშობდა. ვთქვათ ისიც, რომ 23 წლის ფეხბურთელმა ლიგა 1-ში ზედიზედ მესამე ტურში შეძლო თავის გამოჩენა. „მეცმა“ ზედიზედ მეორე თამაში მოიგო, 23 ქულა დააგროვა და ჯერ გასავარდნ ზონაში, მე-17 ადგილზე რჩება, მაგრამ გადარჩენისთვის ბრძოლაში ჩართულია. ლაშლო ბოლონის გუნდი მომდევნო ტურში 17 მარტს, სტუმრად „რეიმსს“ დაუპირისპირდება.