„ბაიერნის“ ფორვარდმა ჰარი კეინმა უეფას შეჯიბრებებში 51-ე გოლი გაიტანა, რაც სარეკორდოა - წერს პოპულარული ინტერნეტპორტალი Squawka.

წყაროს ცნობით, ჩემპიონთა ლიგის მერვედფინალური ეტაპის „ლაციოსთან" საპასუხო მატჩში (3:0) შესრულებული დუბლის წყალობით, კეინი ისტორიაში პირველი ბრიტანელი გახდა, რომელმაც უეფას ტურნირებზე 50-ზე მეტი გოლი გაიტანა.

გოლების რაოდენობით ბრიტანელებს შორის მეორე ადგილზეა სტივენ ჯერარდი (41), ხოლო მესამეზე - უეინ რუნი (40).

შეგახსენებთ, რომ კეინი „ბაიერნში" გასულ ზაფხულს „ტოტენჰემიდან" 105 მილიონ ევროდ გადავიდა, ამ სეზონში ფორვარდმა ყველა ტურნირზე მიუნხენური კლუბის შემადგენლობაში 33 მატჩში ამდენივე ბურთი გაიტანა და 8 საგოლე გადაცემა შეასრულა.

ფეხბურთელის კონტრაქტი გერმანულ კლუბთან ძალაშია 2027 წლის ივნისის ბოლომდე.