მიუნხენის „ბაიერნის“ თავდამსხმელმა ჰარი კეინმა განაცხადა, რომ გუნდი რთულ მდგომარეობაშია, მაგრამ ბრძოლა უნდა გააგრძელონ და სიტუაცია შეცვალონ. ინგლისელმა კომენტარი "ლაციოსთან" მატჩის (0:1) შემდეგ გააკეთა.

„ძალიან რთული კვირა გამოვიდა. პირველ ტაიმში კარგად დავიწყეთ, რამდენიმე მომენტი გვქონდა, მათ შორის მეც. ასეთ მატჩებში გადამწყვეტი ეპიზოდებია. მეორე ტაიმში პირიქით მოხდა, ნაკლები ენერგიით და თავდაჯერებით ვითამაშეთ, ამისთვის დაგვსაჯეს. რთულია, როცა 10 ფეხბურთელით რჩები. გუნდში უნდა ვიპოვოთ გამოსავალი, ბრძოლა უნდა გავაგრძელოთ. ნამდვილად რთულ მდგომარეობაში ვართ, მაგრამ უნდა ვიბრძოლოთ, ეს სიტუაცია უნდა შევცვალოთ. უკან არ დავიხევთ, არაფერს დავთმობთ. უბრალოდ, რაღაც უნდა შევცვალოთ“, - თქვა კეინმა.

შეგახსენებთ, რომ მიუნხენის „ბაიერნი“ იტალიურ გუნდთან 2011 წლის შემდეგ პირველად დამარცხდა. ამ გუნდების საპასუხო მატჩი 5 მარტს გაიმართება.