საქართველოს ეროვნულ ოლიმპიურ კომიტეტს, საქველმოქმედო ფონდ ,,ავერსსა" და ,,ავერსის კლინიკა"-ს შორის უკვე 15 წელია გრძელდება თანამშრომლობა.

მემორანდუმი პირველად 2009 წლის 19 თებერვალს გაფორმდა.

დღეს სეოკ-ის პრეზიდენტმა ლერი ხაბელოვმა და საქველმოქმედო ფონდ "ავერსის" დამფუძნებელმა პაატა კურტანიძემ თანამშრომლობის შესახებ მორიგ მემორანდუმს მოაწერეს ხელი.

მემორანდუმის თანახმად, საქველმოქმედო ფონდი ,,ავერსი" იღებს ვალდებულებას 2024 წლის განმავლობაში საქართველოს ოლიმპიური ნაკრების წევრებს და ვეტერან სპორტსმენებს უფასოდ გაუწიოს სამედიცინო მომსახურება ,,ავერსის" კლინიკათა ქსელში და უზრუნველყოს მკურნალობისთვის საჭირო ყველა მედიკამენტით.

ლერი ხაბელოვმა მადლობა გადაუხადა „ავერსის" საქველმოქმედო ფონდისა და კლინიკის ხელძღვანელებს ვეტერანი და მოქმედი სპორტსმენების მნიშვნელოვანი მხარდაჭერისთვის: „ჩვენი თანამშრომლობა უკვე 15 წელიწადს ითვლის და ამ წლების განმავლობაში თქვენი უანგარო დახმარებით ძალიან ბევრმა ჩვენმა სპორტსმენმა და სპორტის მუშაკმა ისარგებლა. ჩვენი თანამშრომლობა წარმატებით გრძელდება და ამისთვის დიდ მადლობას მოგახსენებთ. მოგეხსენებათ, 2024 წელი ოლიმპიური წელია - რამდენიმე თვეში პარიზში მორიგი ოლიმპიური თამაშები გაიმართება და იმედი გვაქვს, რომ ჩვენი დელეგაცია საფრანგეთში წარმატებით გამოვა, ამაში კი თქვენი მნიშვნელოვანი წვლილი იქნება."

მემორანდუმის ხელმოწერის ცერემონიალს ესწრებოდნენ სეოკ-ის პირველი ვიცე-პრეზიდენტი ელგუჯა ბერიშვილი, ვიცე-პრეზიდენტი მამუკა ხაბარელი, გენერალური მდივანი ემზარ ზენაიშვილი, ,,ავერსის" კლინიკათა ქსელის გენერალური დირექტორი დიმიტრი ჯორბენაძე, საქველმოქმედო ფონდ ,,ავერსის" დირექტორი ქეთევან ნემსაძე, ოლიმპიური და მსოფლიოს ჩემპიონები, მოქმედი და ვეტერანი სპორტსმენები.

geonoc.org.ge