აზიის თასის მეოთხედფინალური ეტაპის ცენტრალურ შეხვედრაში ირანის ნაკრებმა იაპონია დაამარცხა და ნახევარფინალში გავიდა.

ორივე გუნდი ტურნირის მთავარ ფავორიტებში იყო, შესაბამისად, მეოთხედფინალში მათი დუელი დიდ ინტერესს იწვევდა. ორი განსხვავებული ტაიმი შედგა: პირველ ნახევარში იაპონია გაცილებით უკეთ ირჯებოდა და ჰიდემასა მორიტას გოლით 28-ე წუთზე დაწინაურდა კიდეც.

თუმცა, მეორე ნახევარში მოედანზე ვითარება შეიცვალა. იაპონიის ნაკრები ძალიან სუსტად გამოიყურებოდა, განსაკუთრებით დაცვაში. შედეგად, 55-ე წუთზე მოჰამედ მოჰებიმ გაათანაბრა, ხოლო მსაჯის მიერ კომპენსირებულ ბოლო წუთზე დაცვაში კო იტაკურამ ითამაშა კატასტროფულად და პენალტი აიკიდა, რომელიც ალირეზა ჯახანბახშმა გოლად აქცია - 2:1.

ირანის ნაკრები ნახევარფინალში კატარისა და უზბეკეთის წყვილში უმჯობესს შეხვდება. მეორე ნახევარფინალურ წყვილში კი იორდანია და სამხრეთ კორეა შეხვდებიან.